Тываның Чазааның аппарат хуралында Росхереглелхайгааралының Тывада эргелелиниң удуртукчузу Людмила Салчак ооң дугайында дыңнаткан. Эрткен неделяда аарыг көдүрүлген: 32 кижиде аарыгны бадыткаан, оларның аразында 24 улуг база 17 хар назылыг 8 бичии уруглар бар.
Ооң мурнунда неделяга деңнээрге, аарыг 90 хуу көвүдээн (ол неделяда 17 таварылга бүрүткеттинген). Эрткен неделяның бир хонуунда-ла ортумаа-биле дөрт аараан таварылганы бүрүткээн. Июнь 14-ниң байдалы-биле алырга, республиканың халдавырлыг аарыглар эмнелгезинде алды аарыг кижи эмнедип чыдар. COVID-19 деп диагнозтуг чеди кижиниң байдалы чүгээр болганындан, амбулаторлуг эмнээшкинде.
Росхереглелхайгааралының Тывада эргелели чайгы үеде амы-хууда база коллективтиг айыыл чок чорукче угланган профилактика хемчеглерин суларатпазын сагындырган. Тыныш халдавырларындан камгаланыр дизе, холду саваңнап чуур, доктаамал ажыглаар чүүлдерин аштап-арыглаар. Өске кижилер-биле чугаалажырда, ырадыр туруп алыр, хөй кижилиг черлерге барганда, арынга масканы кедер.
Өрээл иштин доктаамал агаарладыр, өл арыглаашкынны чорудары чугула. Аарыксап турар кижилерни ажылдатпазы күзенчиг.