Закрыть
Логин:
Пароль:
Забыли свой пароль?
Войти    

Тывага Камбы-лама эргелелиниң үндезилеп тургустунганының 105 чылын демдеглээн

Тывага Камбы-лама эргелелиниң үндезилеп тургустунганының 105 чылын демдеглээн  14.06.2024

Тывада Пандито Камбы-лама институдун үндезилеп тургускандан бээр 105 чылын калбаа-биле демдеглеп эрттирип турар. Байырлалга киржири-биле Дрепунг Гоманг хүрээниң бедик саңныг башкызы Джигме Гьяцо, Россияның сарыг шажын чүдүлгелиг регионнары Бурятия, Забайкалье, Калмыкия, Даг-Алтай, Хакасия болгаш Новосибирск, Чита, Самара, Санкт-Петербург, Москва хоорайлардан, ол ышкаш Индия биле Моолдан делегациялар Кызылда чедип келген.

Россияның президентизи Владимир Путинниң Чарлааны Өг-бүле чылында хемчегни эрттирип турар улуг ужур-уткалыг. Аныяк салгалдың кижизидилгезинге, өг-бүлелерни кадагалап, ону камгалап, езу-чаңчылдарын быжыглаарынга онза черни ээлеп турар шажын чүдүлге айтырыы чурттуң политиказының бир кезээ апарган.
 
Тыва Республиканың Чазаа, Тыва Республиканың Камбы-лама эргелели, Буддизм өөредилгезин база шинчилелин деткиир фонд ол төөгүлүг болуушкунга тураскааткан «Буддийжи саммит» делегей конференциязын эрттирген. Ооң ажылынга өөредилге болгаш кижизидилге айтырыы-биле сырый харылзаалыг ажылдыг специалистер, школа башкылары, студентилер, регионалдыг яамылар болгаш ведомстволар ажылдакчылары, хөй-ниити организацияларының төлээлери, эртемденнер киришкен.
 
Тываның Баштыңының оралакчызы Орлан Сарыглар, Тываның күрүне университединиң ректору, философия эртемнериниң доктору, профессор Ольга Хомушку, Сарыг шажын өөредиинге болгаш шинчилелинге деткимче фондузунуң вице-президентизи Денис Возилов, Будиистерниң төп чүдүлге эргелелиниң даргазы Сергей Киришов база Тыва Республиканың Камбы-ламазы Гелек Нацык-Доржу улуг шажынчы байырлалдың киржикчилеринге болгаш аалчыларынга, ырак-чооктан чыглып келген чүдүкчү чонга онзагай болуушкун-биле байырын чедирген.
 
Делегацияларның кежигүннери Тываның найысылалы Кызыл хоорайның төөгү тураскаалдары болгаш өске-даа онзагай черлери-биле таныжып көргеннер. Тываның Национал музейинге республикага сарыг шажын сайзыралының эрткен оруунга экскурсия үезинде төөгүнүң кадагалаттынган материалдын сонуургап көргеннер.
 
Музейге экскурсия соонда, Дрепунг Гоманг Дацанның Камбы-ламазы Джигмед Чамзы Тыва шажын-чүдүлге, культура болгаш төөгүнүң тураскаалдары дээш өске-даа чүүлдери-биле онзагай дээрзин демдеглээн.

Бөгүн байырлалдың хемчеглери ам-даа уламчылап турар. Тыва Республиканың Камбы-Ламазының шаңналы дээш тыва хүреш болгаш тыва чадан баг адар маргылдаалар хөйнүң кичээнгейин хаара тудар.

Возврат к списку