Закрыть
Логин:
Пароль:
Забыли свой пароль?
Войти    

"Тургенев чайында" эрзинчилерниң кайгамчыктыг чедиишкиннери

"Тургенев чайында" эрзинчилерниң кайгамчыктыг чедиишкиннери 18.06.2024

Москвага «Тургенев чайы» V чоннар аразының фестиваль-конкурузунга Эрзин кожууннуң ансамбли чедиишкинниг киришкен. Хары угда үш коллектив: «Надежда» ыры ансамбли, «Чинчилиг» мода болгаш костюм театры база «Эрзин» ансамблиниң солистери бирги черлерни ээлээн.

Жюри кежигүннери «Надежда» ансамбилин ийи катап – Гран-при-биле бирги черже идип үндүрген. Ансамбльда 60 болгаш оон өрү назылыг хоочуннар – эмчилер, башкылар, чагырга ажылдакчылары, хөй-ниитичилер, спортчулар болгаш өске-даа пенсионерлер хаара туттунган.

• Эрзин кожууннуң баштыңы, «Надежда» ансамблиниң солизи Игорь Ламажап «Мой дом Россия» деп ырызы-биле «Чаңгыстың ыры» номинацияга бирги чергениң лауреадынга төлептиг болган.

• «Надежда» ыры ансамбли «Агайлар» деп көргүзүү-биле «Хореография» номинацияга бирги чергениң лауреады чедир тепкен.

• «Надежда» коллективи ТР-ниң уран чүүлүнүң алдарлыг ажылдакчызы Аяна Монгуштуң болбаазыратканы «Самагалдай» деп тыва улустуң ырызы-биле «Ыры ансамбли» деп номинацияга бирги чергениң лауреады атты чедип алган.

• «Чинчилиг» мода болгаш костюм театры коллекциями «Төре-Хөлдүң чалгыглары» база «Кочевница» коллекциялары-биле «Мода болгаш дизайн» деп номинацияга бирги чергениң лауреады болган.

• «Чинчилиг» мода болгаш костюм театрының удуртукчузу база дизайнери, ТР-ниң уран чүүлүнүң алдарлыг ажылдакчызы Андрей Неверицкийни жюри тускай шаңнал-биле демдеглээн.

Бот-тывынгыр катыжыышкыннарның удуртукчулары канчаар-даа аажок улуг чоргааралын илереткен. Эрзинчилер 50 муң рубль акша шаңналындан аңгыда, келир чылдың январьда Россияга эртер бирги мюзик фестивалынче чалалганы алганнар:

«Фестивальче чоруур мурнунда бир ай ишти белеткендивис. Эки киржип, шаңналдыг черни черле алыр сорулгалыг турдувус. А мынча хөй шаңналдыг боор бис деп, бодаваан-даа бис. Эртен тоолчургу ВДНХ-га, Тываның булуңунга, оюн-көргүзүүвүстү бараалгадыр бис. Москвада «Россия» делгелге-шуулганның көрүкчүлери база аалчылар бистиң уран чүүлүвүстү бедии-биле үнелээринге идегээр мен» - деп, кожуун чагыргазының культура эргелелиниң начальниги Ольга Куулар дыңнаткан.

ТР-ниң улустуң артизи, балетмейстер-хореограф Аян Мандан-Хорлуу, ТР-ниң алдарлыг артизи Владлена Томур, «Надежда» хоочуннар ансамбли клуб каттыжыышкынының удуртукчузу Долита Допчут, «Эрзин» ыры болгаш танцы ансамблиниң ыраажыларын белеткээн Эрзин кожууннуң алдарлыг артизи Сайлыккай Ондар чогаадыкчы коллективтер делегациязын баштап чораан.

Москва хоорайда Тыва Республиканың бүрүн эргелиг төлээ чериниң каналында бо шөлүгден https://vk.cc/cxIBfl артистерниң оюн-көргүзүүнүң видеозун көрүп болур.


Возврат к списку