Закрыть
Логин:
Пароль:
Забыли свой пароль?
Войти    

Тывада кады камгалал ажылдакчыларның хүнүн демдеглээн

Тывада кады камгалал ажылдакчыларның хүнүн демдеглээн 16.06.2024

Тываның эмчилери боттарының профессионал байырлалын байырлыг байдалга демдеглээн. ССРЭ-ниң составынче Тыва Арат Республиканың эки тура-биле каттыжып киргениниң 80 чылында Тываның Баштыңы Тывада Кадыкшыл чылын чарлааны эмчи ажылдакчыларынга онзагай чыл болган.

Кызылдың Улусчу чогаадылга бажыңынга Медицина ажылдакчызының хүнүнге тураскааткан байырлыг хуралда ТР-ниң Чазааның Даргазының оралакчызы Орлан Сарыглар Тываның кадык камгалалын хөгжүдеринге эге үе чадазында ажылдап чораан адырның хоочуннарынга онза хүндүткелди илереткен. Сөөлгү чылдарда кадык камгалалының бирги звенозу база көдээ черлерде объектилер хөйү-биле чаартынганын вице-премьер демдеглээн. Орлан Сарыглар республика чазааның мурнундан кандыг-даа үеде ачы-буянын көргүзүп чоруур Тываның эмчи ажылдакчыларынга четтиргенин илерткен:

«Төрээн черивистиң келир үезинге, сайзыралынга чурттакчы чоннуң кадык амыдыралы чугула черни ээлеп турар. Ынчангаш 2024 чылды Кадыкшыл чылы кылдыр Владислав Товарищтайович анаа эвес чарлаан. Профессионал байырлалыңар таварыштыр байыр чедирип тур бис. Тыва нацияны камгалап арттырарынга силерниң үлүг-хууңар кончуг улуг. Эмчилер хүнүнде дайынчы хөделиишкиннер девискээринде идепкейжи ажылдап чоруур эмчилерни база демдеглээри чугула. Олар, ок-боо туткаш, төрээн чуртун камгалап чоруур дайынчылар дег, дүн-хүн чокка кижилерниң кадыкшылы дээш демисежип чоруур» – деп, Орлан Сарыглар чугаалаан.

Республикада 11 муң ажыг кижи: 1,5 муң эмчилер, 6,2 муң ортумак болгаш биче эмчи ажылдакчыларны Эмчи ажылдакчызының хүнүнде профессионал байырлалын демдеглеп турар. Оон аңгыда 70 хире провизорлар болгаш фармацевтилерге база регионнуң эмнелге албан черлеринде өске-даа мергежилдерлиг 3200 кижиге байыр чедириишкинин алган.

ТР-ниң Перинаталдыг төвүнүң бичии уруглар эмчизи Шораана Борисовна Бокаштай, ТР-ниң 1 дугаар эмнелгезиниң нейрохирургия салбырының нейрохирургу Римма Чыскаал-ооловна Күдерек, бичии уругларның консультация-диагностиктиг төвүнүң эмчизи Надежда Тираевна Салчак, ТР-ниң бичии уруг­лар эмнелгезиниң эмчизи Лада Кадыр-ооловна Шаравии, Улуг-Хем кожууннуң А.Т. Балган аттыг төп эмнелгезиниң фтизиатр эмчизи Анастасия Малесковна Шангыш-оол, Улуг-Хем кожууннуң А.Т. Балган аттыг төп эмнелгезиниң поликлиниказында терапевт эмчи Августа Ындырааевна Сарым-оол, Улуг-Хем кожууннуң А.Т. Балган аттыг төп эмнелгезиниң кол эмчиниң оралакчызы Владимир Иванович Данжалов олар «Тыва Республиканың алдарлыг эмчизи» деп бедик атты алганнар.

Эрзин кожууннуң төп эмнелгезиниң бичии уруглар эмчизи Алдын-кыс Александровна Бурен, ол-ла эмнелгениң ниити аарыг­лар эмчизи Чечек Санаевна Ламажап оларга «ТР-ниң кадык камгалалының алдарлыг ажылдакчызы» деп бедик атты тывыскан.

РФ-тиң Федерация Чөвүлелиниң сенатору Дина Оюн, ТР-ниң Дээди Хуралының депутады, Республиканың консультативтиг-диагностика төвүнүң кол эмчизи Долаан Калбак, ТР-ниң кадык камгалал сайыды Анатолий Югай, ТР-ниң Медицина палатазының даргазы Анжела Канчыыр-оол эмчи ажылдакчыларынга байырын чедирип, күрүне болгаш ведомство шаңналдарын тывыскан.

Кадык камгалал сайыды Анатолий Югай кижиниң эң-не улуг байлаа - кадыкшылы болгаш амы-тыны дээш дүн-хүн дивейн могаг шылаг чок чок адыдап чоруур эмчи коллегаларынга байырын чедирген. Ажылчын неделяның дургузунда республиканың кадык камгалалының тулган дээн ажылдакчыларынга шаңнал макталдарын тыпсыр байыр чедириишкиннери уламчылаан.

Россия Федерациязының сенатору Дина Оюн ажылынга шылгараан тос эмчиге Күрүне Думазының кадыкшыл камгалал талазы-биле комитет даргазының Өөрүп четтириишкин бижиктерин тывыскан. Оон аңгыда 11 эмчилер, эмчи сестарлары, фельдшерлер база өске-даа ажылдакчылар ол хүн Россия Федерациязының Кадык камгалал яамызының Хүндүлел бижиинге төлептиг болган. Алды эмчини Тыва Республиканың Кадык камгалал яамызының Хүндүлел бижии-биле демдеглээн.


Возврат к списку