Чалыы назынның байырлапы

Июнь 29 — Россияның аныяктар хүнү. Кызылга бо байырлал Арат шөлүнге болуп эрткен. 

 «Голос Азии» радиостанцияның ажылдакчыларының бо байырлалды солун эрттирер дээш күжениишкиннерин демдеглевес аргажок. Арат шөлүнге Кызыл хоорайның аңгы-аңгы албан черлериниң төлээлери янзы-бүрү акцияларны, таныштырылгаларны, мастер-класстарны эрттирген. Аныяктар янзы-бүрү оюннарга, викториналарга киришкен. Мөөрейлерниң тиилекчилеринге суй белектерни сөңнээн. Хөөмейжилер чыылган чонга хөөмей-сыгыдын бараалгаткан. «Кызылга ынак мен» деп ачы-дуза акциязын организастааш, бичии чаштарга болгаш аныяктарга «Кызылга ынак мен» деп бижиктиг футболкаларны үлээн.

Уран чүүлдүң бир онзагай хевири скульптура делгелгези болган. Чүгле Тывадан эвес, Россияның өске регионнарындан келген даш чонукчулары аныяк-өскенге мастер-класстарны эрттирген, улус чон ону холу-биле тудуп, кылыр аргалыг болган. Чурукчулар бичии чаштарның, аныяктарның, улуг улустуң чуруктарын чуруп бараан болуп, хөйнүң сонуургалын оттурган. Каастаныр «булуңче» бичии чаштар база улуг улус дыка идепкейжи барып, арнынга база хол, буттарынга янзы-бүрү хевирлиг чуруктарны чурудуп ап турган.

Национал тыва хеп делгелгезиниң майгыны. Ооң чанында аргаан-даараан хептерни хөйү-биле делгээн болгаш сонуургаан кижилерге канчаар даараарын, аргыырын көргүзүп тайылбырлаан турлар. Даш-биле чонуп кылган янзы-бүрү овур-хевирлер делгеттинген.

Республиканның наркология диспансери база арагалаашкынга удур төп чонга шенелде болгаш бодун хынаар сорулгалыг хемчеглерни эрттирген. Арат шөлүнге чыылган аныяктарның, чаштарның тура-соруун көдүрүп, хөглүг хөгжүм адаанга танцыладып, сула шимчээшкиннерни кылдырткан.

«Аныяктар наркотикке удур» деп акция эрткен. Юлия Хирбээниң удуртулгазы-биле «Торгунуң кылаңнаажы» деп хеп көрүлдезин чараш кыстар чонга көргүскен. Аныяктар хүнүнге тураскааткан байырлыг концертин талантылыг аныяк ыраажы Сайлык Оммун бараалгаткан. Ол ышкаш чаа сайзырап, өзүп турар «Салгал» бөлүү аныяктарга байыр чедирип ырлаштылар.

Идепкейжи чаа-чаа бодалдарын, идеяларын амыдыралга боттандырып, хөй-ниити ажылынга улуг үлүүн киирип чоруур аныяктарга шаңналдарны байырлыг байдалга тывыскан. Аныяктарга амгы шагның оюн-самын организастаан. Арат шөлүнге ол кежээ омак-хөглүг, солун болган.

Чодураа Кенден.