Тываның уруглары Кремль елказынче баар

ТР-ниң Өөредилге болгаш эртем яамызының дыңнатканы-биле бо чылын Россияның Президентизиниң Кремльге болур елказынче Тывадан 12 уруг чоруур.

Аас-кежиктиглерниң аразында Кызылдан, Ак-Довурактан болгаш республиканың чеди кожуунундан оолдар, уруглар бар. Онза кичээнгейни хөй ажы-төлдүг, долу эвес болгаш социал байдалы берге өг-бүлелерден база «изиг точкаларга» амы-тынындан чарылган ИХЯ ажылдакчыларының уругларынче угландырган.

Улуг-Хем кожууннуң Арыг-Yзүү ортумак школазының өөреникчизи 12 харлыг Долаан Ооржак — чурттуң эң-не кол елказынче баар уругларның бирээзи. Ол — тергиин өөреникчи, «21 чүс чылдың лидери» мөөрейниң тиилекчизи.

Национал театрга декабрь 25-те болур Тываның Баштыңының Чаа чыл елказы республиканың уругларын база манап турар. Чазак Даргазының елказынга 7 хардан 14 харга чедир 700 уруг республиканың булуң бүрүзүнден келир. Елкаже чалалгаларны бирги ээлчегде социал байдалы берге, азырап алган өг-бүлелерден тергиин өөредилгелиг, салым-чаяанныг өөреникчилер болгаш арга-арыг камгалалының албанының маадырлыы-биле өлген десантчы өртчүлерниң уруглары алыр.

Тываның Баштыңының елказының киржикчилерин Соок-Ирейден белектер манап турар. 2014 чыл Тывада Орус дыл чылы болганда, белектерниң аразында янзы-бүрү номнар — кол черде. Көдээ черлерден келген уруглар Тываның Национал музейи болгаш Кызылдың онза төөгүлүг черлери-биле таныжар аргалыг болур.