Кызылда Ада-чурттуң Улуг дайынының маадырларынга сактыышкын езулалын эрттирген

Бөгүн Тываның найысылалынга Улуг Тиилелгениң 79 чылынга тураскааткан митинг болуп эрткен. Ук хемчегге Ада-чурттуң Улуг дайынының хоочуннары, тылдың ажыл-ишчилери, дайынчы хөделиишкиннер болгаш тускай шериг операциязының киржикчилери, республика эрге-чагыргазының, хөй-ниити организацияларының төлээлери, өөреникчилер болгаш аныяктар киришкен. Ада-чурттуң Улуг дайынының маадырларынга сактыышкынның минутазын чарлап, тиилекчи шериглерниң тураскаалынга кызыл гвоздикалар биле боодал чечектерни салган.

Тускай шериг операциязының үезинде, дайынчы хүлээлгезин күүседип тура, эрес-дидим болгаш маадырлыг чоруу дээш чоокта чаа Россияның Маадыры хүндүлүг атты алган биче сержант Буян Куулар митингиниң хүндүлүг аалчызы болган. Ада-чурттуң Улуг дайынының солдадының маадырлыг чоруу шупту салгалдарга эрес-дидим чоруктуң үлегери бооп кезээ мөңгеде артар деп, Буян Куулар бодунуң чугаазында демдеглээн.
«Ада-чурттуң Улуг дайынының хоочуннары бистиң шуптувуска үлегерлиг чижек-тир – деп, дайынчы демдеглээн. – Бистиң тыва чоннуң Улуг Тиилелгеге киирген үлүг-хуузунга чоргаарланып чоруур бис. Бистиң маадырларывыс – тыва эки турачыларның маадырлыг чоруун кезээде сактып, мөгейип чоруур бис».

Ада-чурттуң Улуг дайынының доозулганының 79 чылын бөгүнде дайынның дөрт хоочуну, бүзээлеткен Ленинградтың бир чурттакчызы, фашист концлагерьлерниң бир хоругдаткан кижизи, ол ышкаш тылдың 50 ишчизи база фронтучуларның 29 дулгуяктары демдеглеп эрттирип турар.

Тываның найысылалының чурттакчылары болгаш аалчылары чылдың-на Тиилелге хүнүнүң бүдүүзүнде маадырларга сактыышкынның хүндүткел езузун эрттирери-биле чыглып, Тиилелгениң үнези кайы хире аар болгаш улуг болганын аныяк салгалга сагындырып, чугаалап чоруурлар.