Тывада арга-арыг кирерин хораан

Тывада апрельдиң 16-дан май 6-га чедир өртке удур онза чурумну ам-даа узаткан. Ооң мурнунда арга-арыг ажыл-агыйларындан бижиттирип алган чөпшээрели-биле ынаар кирип болур турган болза, ам ону шуут хораан. Ол ышкаш бок болгаш кургаг сиген өрттедири хоруглуг. Республиканың Баштыңы Владислав Ховалыг, регионда чылыг болгаш кургаг агаарның тургустунганы-биле долу хоруушкунну киирген деп, тайылбырлаан.

- Апрельдиң ортандан бээр республикага тос өрттү өжүрген. Ниитизи-биле 178 гектар шөлдү өрт таварып эрткен. Өрттерниң үнген чылдагааны – кижилерде – деп, регионнуң баштыңы дыңнаткан.

Республикада онза чурум үезинде черден база агаардан хыналдаларны күштелдирген, арга-арыг инспекторлары дүн-хүн дивейн дежурныйлап турар. Арга-арыг ажыл-агыйлары, кожуун чагыргалары, агаардан арга-арыг камгалалы, регионалдыг ОБЯ дээш, шупту албаннарның ажылын дүүштүрген. Арга-арыг өрттерин өжүреринче 300 кижи, 120 санныг техника үнеринге белен.

Арга-арыгга өрт айыылының негелделерин үрээн буруулуг кижилер корум-чурум, административтиг база кеземче харыысалгазынга онаажып болурун Тываның Арга-арыг ажыл-агый яамызы сагындырган. Өртке удур онза чурум үезинде ону хажытканы дээш торгаал каш катап улгады бээр, хамаатыларга – 40 муң чедир, а юридиктиг черлерге – 500 муң чедир.
Бир эвес арга-арыгда өрт үнгенин эскерип кагзыңарза, 112 дугаарлыг чаңгыс аай телефонче азы регионалдыг диспетчер албанының 8-(39422) 5-04-86 дугаарлыг телефонунче дыңнадыр.