Тываның чурттакчылары чаагайжыдар объектилер дээш бүгү-российжи бадылаашкынга идепкейлиг киришкен

Россияның Тудуг яамызы чаагайжыдар девискээрлер болгаш дизайн төлевилелдер шилиир IV бүгү-российжи онлайн-бадылаашкынның түңнелдерин үндүрген.

«Чуртталга болгаш хоорай хүрээлеңи» национал төлевилелдиң «Таарымчалыг хоорай хүрээлеңин хевирлээри» федералдыг төлевилел чорудуунга марттың 15-тен апрель 30-ге чедир бадылаашкын болуп эрткен. Бадылаашкын үезинде Тыва Республика бадылааннарның саны-биле лидер регионнар санындан шуут дүшпээн. Ооң дугайында Россияның тудуг болгаш ЧКА сайыды Ирек Файзуллин демдеглээн.

«Чечен Республиканың чурттакчылары эң-не идепкейлиг киришкен. Оон аңгыда Тыва Республика, Свердловск облазы, Ставрополь край, Томск облазы, Ямал-Ненец автономнуг округ, Башкортостан Республика идепкейжи регионнарның санында» – деп, Файзуллин демдеглээн.

Российжилерниң шилилгезинче 1,5 муң муниципалдыг тургузугларда 5,4 муң объектилерни салган. Тыва шупту 19 муниципалдыг тругузугда 87 эскиз төлевилелди таныштырган. Бадылаашкынның түңнелинде эң-не хөй үн алган черлер дараазында үнер 2025 чылда чаагайжыттынар.

Волонтерлар хамаатыларның бадылаашкынынга дузалашкан. Бо чылын чуртта 214,8 муң кижилиг волонтер корпузу, а Тывада 1620 аныяктар эки турачылап ажылдаан.

Тывага чаагайжыдар объектилер бадылаашкынынга республиканың 164275 чурттакчызы үнүн берген.

Бо чылын Донецк база Луганск улус республикаларның, Запорожье облазының чурттакчылары бадылаашкынга ийи дугаар киришкенин Россияның Тудуг яамызының баштыңы демдеглээн. Херсон облазы биле Байконур хоорайның чурттакчылары бадылашкынга бир дугаар киришкен.

Бай-Тайга, Барыын-Хемчик, Чөөн-Хемчик, Кызыл, Бии-Хем, Тес-Хем, Тере-Хөл, Тожу, Чаа-Хөл, Чеди-Хөл, Улуг-Хем кожууннарның база Ак-Довурак биле Кызыл хоорайларның объектилеринде ажылдар эрткен чылын эгелээнин Тываның Тудуг яамызы дыңнаткан. Бо чылын ниитизи-биле 30 хөй-ниити дыштанылга черлерин чаагайжыдып тудар.