Тывада өртке удур онза чурум майның 6-га чедир үргүлчүлээр

Тываның Арга-арыг яамызының дыңнатканы болза, республикага өрт айыылының сезону эгелээнинден, ниитизи-биле 122,8 га шөлге арга-арыг өрттери бүрүткеттинген. Май 2-ниң хүнүнде республиканың арга-арыг фондузунда хып турар өрттер чок. Чаъстыг агаар база чурттакчы чоннуң өртке удур чурумнарны сагып турарындан, өрттер болбаан. Эрткен чылын кызыгаарлаашкын хемчеглерин кииргенинден, арга-арыг өрттериниң саны ийи катап кызырылган. Өртке удур онза чурум майның 6-га чедир үргүлчүлээр. Тываның Баштыңы Владислав Ховалыг херек апарза, ол чурумну узадырын дыңнаткан.

Оперативтиг дыңнадыглардан алырга, сөөлгү өрт Балгазын суурдан 18 км-де соңгу талазында Балгазынның арга-арыг участогунга болган. 15.00 шакта 1 га черде өрт илереттинген, 17.00 шакка чедир ону шалыпкын өжүрген. Арга-арыг өрттеринге удур албанның 8 ажылдакчызы, арга-арыг камгалалының 1 ажылдакчызы база 2 санныг техника ону өжүрүшкен. Ооң өөскээн чылдагааны – чаңнык дүшкен.
Өртке удур онза чурум үезинде арга-арыг кирери, боктар болгаш кургаг сиген өрттедири хоруглуг дээрзин, Арга-арыг яамызы сагындырган.
Бо хонуктарда муниципалитеттер чагыргалары чурттакчылыг черлерни долгандыр өртке удур дилиндектерни чардырып доозар.

Арга-арыг өрттериниң үнген чылдагааны - кижилерни буруузунда. Ынчангаш транспрт аймаанга арга-арыгже кирер кызыгаарлашкын күштүг хевээр, ынаар чүгле чөпшээрел бижик-биле эртер. Ону Арга-арыг ажыл-агый яамызындан азы арга-арыг ажыл-агыйларындан бижиттирер.

Өртке удур онза чурумнуң неглделерин үрээр болза, хамаатыларга – 40 муң рубль чедир, юридиктиг черлерге – 500 муң рубль чедир торгаалды онаары көрдүнген.