Россияның Чазаа «Тудуг» күрүне программазының объектилер даңзызынче Тывада онкодиспансер тудуун киирген

РФ-тиң Чазааның айтыышкыны езугаар, Россия Федерациязының «Кадык камгалалының хөгжүлдези» күрүне программазы-биле 2030 чылга чедир ажыглалче киирер объектилер даңзызынче Кызыл хоорайга республиканың онкология диспансери кирген. Чурттуң Президентизи кадык камгалалының айыттынган объектизин тударының талазы-биле ооң мурнунда киирген инициативазын деткээн.

2021 чылда Владимир Путин ажыл-агый аайы-биле, ынчан Тываның Баштыңының албан-хүлээлгезин күүседип турган Владислав Ховалыг-биле видеоконференция харылзаазы таварыштыр ужуражып тура, республиканың туберкулёз биле онкология диспансерлериниң оран-савазын чаартырының дугайында айтырыгны көдүрген. Чурттуң удуртукчузу ынчан регионда онкология болгаш туберкулез аарыглары элээн улуг көргүзүглерлиг дээрзин айыткан. Тываның дыка хөй эмнелге албан черлеринге чаартылга херегин, регионнуң чазаа ол байдалды эдер дээш, бар-ла аргаларны ажыглап турарын Владислав Ховалыг дыңнаткан. Чижээ, Тываның Кадык камгалал яамызы чаа онкодиспансер бажыңын тудар төлевилелди ажылдап кылган.

Владимир Путин ол ужуражылга соонда, Тывага онкология төвү биле туберкулезка удур диспансер тудар төлевилелче акша-хөреңгини аңгылаарын федералдыг яамыга дааскан. 2023 чылдың октябрьда федералдыг Кадык камгалал яамызы база регионалдыг эрге-чагыргалар онкодиспансер тудуунуң «Орук картазын» ажылдаткан.

Россияның кадык камгалал сайыды Михаил Мурашко 2023 чылдың төнчүзүнде ажыл аайы-биле Тывага кээп чорааш, республиканың онкодиспансеринге чедип, «Кадык камгалалы» национал төлевилелинден келген дериг-херекселдер-биле эмнелге албан чери дээштиг ажылдап турарын демдеглээн.

Онкодиспансер «Кадык камгалалы» национал төлевилелин 2020 чылдан бээр боттандыргаш, «Ыжык аарыглары-биле демисел» федералдыг программа таварыштыр 31 санныг эмнелге дериг-херекселдерин садып алган. Специалистер эмнээшкинниң чаа хевирлерин ажылче киирип, ыжык аарыг кижилерниң ниити байдалын экижиткен.

Чылда-ла диспансерге 1500 хире кижи эмнээшкинни ап, эмнелге 600 ажыг кезиишкиннерни кылып, 5000 ажыг патоморфологтуг шинчилелдерни чорудуп турарын, Кадык камгалал яамызы дыңнаткан.

Россия Федерациязының «Кадык камгалалының хөгжүлдези» күрүне программазының боттанылгазы-биле, 2027 чылда 121 оруннуг онкодиспансерниң тудуу эгелээр, төлевилел күүселдезинче 6,8 млрд рубльди тускайлаар.