Тывада соңгукчуларның 95,37 хуузу Владимир Путин дээш үнүн берген

Тыва Республиканың Төп соңгулда комиссиязы протоколдарны 100 хуу хынап, санаан соонда, Россияның Президент соңгулдаларынга соңгукчуларның 95,59 хуузу киришкени тодараттынган. Россия Федерациязының Президент соңгулдаларынга республиканың 189 824 чурттакчызы соңгаан. Тыва соңгукчуларның 95,37 хуузу азы 180 902 кижи Владимир Путин дээш үнүн берген.

- Бистиң хөй национал Тывавыс бир демниин көргүскен. 2018 чылдың соңгулдаларынга келиишкин 93,66 хуу турган. Бедик хамааты харыысалгаңар дээш четтирдим, чаңгыс чер чурттуглар! Президентини шилип тура, Россияның бот-догуннаашкынын, чаңгыс эвин камгалап турар бис – деп, республиканың Баштыңы Владислав Ховалыг бадылаашкынның түңнелдерин бодунуң блогунда бижээн.

РФ-тиң Төп соңгулда комиссиязының сайтызында информастыг таблода, марттың 17-де бадылаашкынның баш бурунгаар медээзинден алырга, протоколдарның 98,0 хуузун аайлаан соонда, Владимир Путин  87,34 хуу үннерни, Николай Харитонов – 4,30 хууну, Леонид Слуцкий - 3,17 хуу, Владислав Даванков – 3,80 хуу үннерни алган.

2018 чылда Россияның Президент соңгулдаларында Тываның соңгукчуларның 93,66 хуузу киришкен. Владимир Путин дээш ынчан соңгукчуларның 92,84 хуузу бадылаан, ийиги черде Павел Грудинин (3,18%), үшкүзүнде – Владимир Жириновский (1,32%) турган.