Тывада чылыг-хандырылга организацияларын хынаар

Тываның Баштыңы Владислав Ховалыг дүүн «ТЭК-4 башкарыкчы компания» күрүнениң унитарлыг бүдүрүлгезинде бактааттынган Ак-Довурактың чылыг-энергетика төвүнге чораан. Котельнаяның үш котелу штаттыг чурумда ажылдап турар.

Республиканың удуртукчузу бүдүрүлгениң коллективинге бо чоокку үеде республиканың чылыг хандырылгазының шупту объектилерин хынаарын дыңнаткан. Шинчилелдерниң түңнелинге даянгаш, келир чылдың одалга сезонунга септелге компаниязын планнаар.

Ак-Довурактың ЧЭТ – бус котельнаязы-биле ажылдап турар республиканың одалга-энергетика комлекизиниң улуг объектилериниң бирээзи. Бүдүрүлге 2016 чылда «ТЭК-4 башкарыкчы компания» күрүнениң унитарлыг бүдүрүлгезиниң Ак-Довурак участогу кылдыр эде тургустунган. Ак-Довурак хоорай чурттакчыларының 80 ажыг хуузу чурттаан чаагайжыттынган бажыңнарны, бүдүрүлге болгаш социал объектилерин изиг суг болгаш чылыг-биле хандырар ажылда 162 кижи хаара туттунган. Эрткен чылын Ак-Довурактың ЧЭТ 60 харлаан юбилейин демдеглээн. Бүдүрүлгеде 30 чыл ажыл стажтыг ажылчыннар бар.

Владислав Ховалыг бүдүрүлгениң удуртулгазы база инженер-техниктиг ажылдакчылары-биле ам болур хыналда-шинчилге үезинде ажылдаар планны сайгарып чугаалашкан.

- Ак-Довурактыг чылыдылга-энергетика төвү чырык бүдүрүлгезинде коштунганындан, бус котелдарын ажыглап турар. ЧЭТ-ти суг чылыдар котелдар-биле эде дериирин чугаалажып көрдүвүс – деп, Тываның Баштыңы хуралдың түңнелин бижээн.

Кызылдың ЧЭТ, Чаа-Хөл, Хову-Аксы суурларда база Шагаан-Арыг, Ак-Довурак хоорайларда “ТЭК-4 башкарыкчы компания” КУБ-туң дөрт улуг котельнаязы, 9 бичии котельная, социал инфраструктура объектилериниң 438 котелдары – шупту 452 объект регионнуң чылыг ажыглакчыларын хандырып турар.

2023 чылдың сентябрь 15-20-де, республиканың шупту 19 муниципалдыг тургузугларының девискээринге 2023-2024 чылдың одалга сезону эгелээнин сагындыраал.