Тываның Баштыңы президент соңгулдаларының үезинде доктаамал болгаш айыыл чок харылзааны хандырар ажылчын бөлүктү тургускан

РФ-тиң Президент соңгулдаларның үезинде Тывада харылзаа каналдарының ажылы дээш харыылаар тускай ажылчын бөлүк тургустунган.

Республиканың Баштыңы Владислав Ховалыг ооң дугайында айтыышкынга атты салган. Ооң даалгазы-биле ажылчын бөлүктү вице-премьер Олег Лукин удуртур. Регионалдыг соңгулда комиссиязының, информастыг албаннарның, ол ышкаш республикада кол соталыг харылзаа операторлары – Мегафон, МТС, Ростелеком, Т2 Мобайл, Тывасвязьинформ дээш, харылзаа бүдүрүлгелериниң төлээлери бөлүктүң составынче кирген.

Россияның Президент соңгулдаларынга белеткел хүннеринде база бадылаашкын үезинде, харылзаа четкизиниң база ооң чепсээниң турум ажылын хандырган чогуур комплекстиг хемчеглерни ажылдап кылыр болгаш боттандырар даалганы Владислав Ховалыг бөлүктүң мурнунда салган. Оон аңгыда, бадылаашкын пунктуларындан видеохайгааралдың база дамчыдылганың чуруунга техниктиг аргаларны хандырарлар.

Соңгулда үезинде штаттан даштаар тургустунуп болур байдалдарны, ону болдурбазының база чайладырының чорудуун ажылчын бөлүктүң киржикчилери-биле сайгарып чугаалашкан. Каналдарның ажылында база харылзаа херекселдеринде үрелиишкиннерже дүрген хөделип, харылзаа талазы-биле айтырыг тургустунуп келгениниң дугайында медээлер хүлээп алыр чаңгыс черни организастаар дугайында шиитпир хүлээп алдынган.