Айыыл-халаптар медициназының федералдыг төвүнден эмчилер Шагаан-Арыгның ЧЭТ-ке өрттен когарааннарны шинчип көрген

Россияның Кадык камгалал яамызының Айыыл-халаптар медициназының федералдыг төвүнүң база өске-даа угланыышкыннарлыг федералдыг төптерниң специалистеринден тургустунган 22 кижи составтыг хөй талалыг эмчи дузазының бригадазы Улуг-Хем кожууннуң Шагаан-Арыг хоорайның чылыдылга-энергетика төвүнге болган онза болуушкунда когараан кижилерни шинчип көрген.

РФ-тиң кадык камгалал сайыды Михаил Мурашко айыыл-халаптар медициназының федералдыг төвүнүң бедик мергежилдиг специалистеринден тургустунган улуг бригаданы Тываже чорутканын Тываның Баштыңы Владислав Ховалыг дыңнаткан.

Эмчилер бригадазы Россияның ОБЯ самоледу-биле 00.00 шакта Кызылга ужуп келген. Тывага келген дораан республиканың 1 дугаар эмнелгезинге четкен. Кадык камгалал сайыды Анатолий Югай, республика эмнелгезиниң кол эмчизи Вячеслав Ховалыг оларны уткуп алган. Когараан кижилер кандыг эмнээшкиннерни алганын көрүп, ам чүнүң-биле дузалаарын тускай эмчилер бригадазы чугаалашкан.

Аай-дедир сөөртүп болурунга аарыг кижилерниң байдалын шинчилеп, тускай эртемниг эмчилерниң илеткелин дыңнавышаан, бирги консилиумну эрттирген. Бир дугаар шинчип көрген соонда, ийи шак эрткенде чамдык кижилерниң байдалы кандыызын база катап көрген.

Специалистер республика эмнелгезиниң өске салбырларында аарыг кижилерни база көрүп, чорудуп болур пациентилерге хамаарыштыр федералдыг клиникалар-биле дугуржулгаларны ырактан чоруткан. Аарыг кижилерниң байдалынга хамаарыштыр специалистерниң түңнелин өөренип көргеш, төнчү шиитпир хүлээп алдынар.