Тывада Шагаан-Арыг хоорайда ЧЭТ-те онза байдалдың чылдагаанын тодарадып турар

Шагаан-Арыгның одалга-чылыдылга төвүнге болган онза болуушкундан когараан 16 кижини эмнелгеде чыттырган. Олар шупту - бүдүрүлгениң ажылдакчылары.

Республиканың эмнелге организацияларындан бригада кадык камгалал сайыды Анатолий Югай баштаткаш, бедик мергежилдиг эмчи дузазын көргүзери-биле Улуг-Хемниң кожууннар аразының эмнелге төвүнче үнүпкен.

ЧЭТ-те онза болуушкун дугайында бирги дыңнадыг дежурныйга 08.49 шакта келгенин, Шагаан-Арыг хоорайның чагыргазы дыңнаткан. Одалга болгаш энергетика сайыды Эдуард Куулар 09.00 шакта Шагаан-Арыгже үнүпкен. Болуушкуннуң канчаар болганын тодарадып турар.

Тываның Баштыңы Владислав Ховалыгның дыңнатканы болза, ОБЯ, ИХЯ, Росгвардияның, регионалдыг Кадык камгалал, Чуртталга-коммунал ажыл-агый, Одалга болгаш энергетика яамыларының, ХК база ОБ албанының удуртукчулары кирген оперативтиг штаб тургустунган. «Ооң уржуктарын дарый чайладыр дээш аварийлиг бригадаларны чыгган» - деп, Тываның Баштыңы бодунуң блогунда бижээн.

17 дугаар өрт-камгалал кезээниң 7 кижизи, 4 санныг техниказы ында ажылдап турарын камгалакчыларның дыңнаткан. РФ-тиң ОБЯ ТР-де кол эргелелиниң оперативтиг бөлүү база Шагаан-Арыгда чеде берген.