Тывада ОРВИ болгаш грипптен аарыыры эвээжеп эгелээн

Тыва бо эпидемиологтуг сезонда соокка алзыр аарыгларны чүгээр эрткен. Росхереглел хайгааралының регионалдыг эргелелиниң ТР-ниң Чазаанче киирген оперативтиг сан-чурагайының түңнелдеринден көөрге, эрткен неделяда республикада аарып турарларның саны эвээжеп эгелээн.

Частың бирги хүнүнде, бүгү регионда ОРВИ болгаш грипптен аараан 473 таварылга бүрүткеттинген. Оң мурнунда неделяга деңнээрге, 19,3 хуу баткан. Неделяда эмнелгеге чыттырган кижилерниң саны барык 11 хууга, азы 25 кижи чедир кызырылган.

Декабрьдан тура сезон эгелей бээрге, республика девискээринде грипптен аарааны лабораторияга бадыткаттынган 319 таварылганы бүрүткээн. Аараан ийи кижиниң бирээзинден-не А грипптиң дыка дүрген өскерлир, тодараттынмаан хевирин тыпкан. А ийигилери А/H3N2, азы гонконг гривин 135 кижи аарып эрттирген.

Бо сезонну коронавирус база оюп эртпээн. Марттуң 1-ниң хүнүнде республикада ковидтен аараан чүгле 3 таварылга болган. Амгы үеде коронавирустаан 2 кижи стационарлыг эмнеээшкинде, а 3 кижи бажыңында эмненип турар. Аараан 50 кижиге санаан орун фондузу хостуг.