Тываның кадык камгалал адырының ажылдакчыларынга «Буянныг чүрек» күрүне шаңналдарын тывыскан

Тыва Республиканың Кадык камгалал яамызының түңнел коллегия хуралында, кадык камгалал системазында болгаш медицина эртеминде чаартыкчы, онзагай болгаш ынаныштыг ажылы-биле шылгараан медицина база фармацевтика, эртем ажылдакчыларынга күрүне шаңналдарын тывыскан. Бо чылын алды аңгы угланыышкынга шаңналдарны 17 эмчи алган. Ол ышкаш эрткен чылдың түңнелдери-биле эки ажылдаан кадык камгалал организацияларынга акша сертификаттарын тывыскан.

Россия Федерациязының кадык камгалал сайыды Михаил Мурашконуң эрткен чылдың төнчүзүнде республикага сургакчылаашкынының түңнели-биле бадылаан даалгаларының күүселдезин база 2023 чылда эмнелге организацияларның ажылының түңнелдерин коллегияда чугаалажып көрген. Президент Владимир Путинниң шиитпири-биле хүлээп алдынган «Кадык камгалалы» база «Демография» национал төлевилелдер күүселдези-биле республиканың кадык камгалалынга үре-түңнелдиг чыл эрткени демдеглеттинген. 

Республиканың Баштыңы коллегияның ажылын ажыдып тура, президент инициативаларның ачызында сөөлгү чылдарда адырда хөй-ле өскерлиишкиннер болганын демдеглээн:

- 45 ФАП, 8 амбулатория ажыттынган, 6 эмнелгеде капитал септелгени чоруткан. Республика бедик технологиялыг 350 ажыг дериг-херекселдерни алган. Чаңгыс чер чурттугларывыс ханы эмчи шинчилгези эртип азы эмнедип алыры-биле Саян ажыр чоруп турган болза, амгы үеде маңаа шинчилгени эртип алыр аргалыг апарганнар – деп, Владислав Ховалыг чугаалаан. 

Яамының ажыл-агыйын түңнээн соонда, республиканың эң-не шылгараңгай эмчилеринге “Буянныг чүрек” болгаш өске-даа тускай номинацияларга күрүне шаңналдарын алганнарның аттарын чарлаан.

"Буянныг чүрек" күрүне шаңналының «Чылдың технологиязы», «Чылдың камгалакчызы», «Онза айыылдыг байдалдарда ажылы дээш», «Кижиниң амы-тынын камгалаары-биле ховар кезиишкинни чорутканы дээш», «Чуртталганың үндезини», «Бирги эмчи-санитар дузазын шынарлыг көргүскени дээш» деп номинацияларның лауреаттарын тодарттынган. Тываның Баштыңы Владислав Ховалыг биле ТР-ниң Дээди Хуралының даргазы Кан-оол Даваа акша сертификаттарын тывыскан. 

«Буянныг чүрек» күрүне шаңналының «Чылдың камгалакчызы» номинацияның 333 333 рубль түңнүг акша сертификадын:

- 1 дугаар республика эмнелгезиниң нейрохирург эмчизи Уйнукай Кежиктиг Германович, Тыва Республиканың Перинаталдыг төвүнүң анестезиолог-реаниматолог эмчизи Монгуш Вячеслав Сарыг-оолович, Таңдының төп кожуун эмнелгезиниң кезер эмчизи Ондар Инна Андреевна алганнар.

«Онза айыылдыг байдалдарда ажылы дээш» номинацияның 333 333 рубль түңнүг акша сертификадын:

- Өвүрнүң төп кожуун эмнелгезиниң акушер-гинеколог эмчизи Куулар Ульяна Төгүс-ооловнага, 1 дугаар республика эмнелгезиниң анестезиолог-реаниматолог эмчизи Ондар Дмитрий Робертович, Тыва Республиканың Перинаталдыг төвүнүң анестезиолог-реаниматолог эмчизи Парчина Чодураа Владимировна алган.

«Бирги эмчи-санитар дузазын шынарлыг көргүскени дээш» номинацияның 1 млн рубль түңнүг акша сертификадын 1 дугаар республика эмнелгезиниң терапевт эмчизи Артаа Венера Монгун-ооловна, 800 000 рубльдиң сертифакадын 1 дугаар республика эмнелгезиниң эмчи сестразы Монгуш Долчан Сайн-ооловна алган. 

«Чылдың технологиязы» номинацияга республиканың онкология диспансериниң хирург-онколог эмчизи Идам-Сюрюн Буян Иванович, республиканың консультативтиг-диагностика төвүнүң хирург эмчизи Чооду Шолбан Викторович төлептиг болган.

Республиканың уруглар эмнелгезиниң травматолог-ортопед уруглар эмчизи Донгак Альберт Владимирович ийи дакпыр шаңналды: «Буянныг чүрек» күрүне шаңналдының «Чылдың технологиязы» номинацияның акша шаңналынга база «Тыва Республиканың алдарлыг ажылдакчызы» хүндүлүг атка төлептиг болган. Зал туруп келгеш, лауреатка байырын чедирген. 

«Кижиниң амы-тынын камгалаары-биле ховар кезиишкинни чорутканы дээш» номинацияның 333 333 рубль түңнүг акша шаңналын:

- 1 дугаар республика эмнелгезиниң эмчилери - хирург Сат Буян Александрович, уруглар хирургу Хертек Кежик Вячеславович база хан-дамыр хирургу Саая Шораан Биче-оолович алганнар. 

«Чуртталганың үндезини» номинацияның 333 333 рубль түңнүг сертификадын:

- Тыва Республиканың Перинаталдыг төвүнүң эмчилери - анестезиолог-реаниматолог Монгуш Айдын Алексеевичиге, акушер-гинеколог Монгуш Алдынай Самбууевнага, анестезиолог-реаниматолог Анай-оол Буян Николаевичиге тывыскан.

Алдынай Самбууевна Монгуш республиканың Перинаталдыг төвүнде 22 чыл ажылдап турар. Бо үениң дургузунда ажылын солуур деп бодал ооң бажынга чаңгыс-даа катап кирбээнин эмчи чугаалаан. “Перинаталдыг төптүң мурнундан Шагааның ыдыктыг айында бистиң ажылывысты үнелеп турары дээш өөрүп четтирдим. Ылаңгыя Россия Федерациязының Өг-бүле чылында акушер-гинеколог кижиниң ажылын үнелеп турары база бир онзагай. Өг-бүлениң аас-кежии хөй кезиинде акушер-гинеколог кижиниң ажылындан улуг хамааржыр. Ынчангаш өг-бүлелерге дуза кадып чоруур ажыл-ижимге чоргаарланып, шаңнал алганымга канчаар-даа аажок өөрүп тур мен”.

Республиканың эр чонунга база Ада-чурттуң камгалакчылар хүнүн таварыштыр байырын ол чедирип, оларга кадыкшылды болгаш аас-кежикти күзээн. Чер кырында амыдырал эр чондан онза хамааржыр дээрзин акушер-гинеколог эмчи онзалап демдеглээн.

Кадык камгалал адырынга ачы-хавыяазы болгаш төлептиг ажылы дээш “Шылгараңгай ажылы дээш” деп медаль-биле кадык камгалалының хоочуну Дугаар-оол Даржааевич Хертекти шаңнаан.

Ол ышкаш республиканың эки түңнелдерлиг ажылдаан эмнелге албан черлериниң ажыл-ижин база үнелеп, шаңнап-мактаан.

“I бөлүктүң эң-не тергиин эмнелге албан чери” дээш 500 муң рубль акшаның сертификадын Бай-Тайганың төп эмнелгезинге берген. “II бөлүктүң тергиин эмнелгези” дээш 700 муң рубльдиң сертификадын Республиканың консультация-диагностика төвүнге, “III бөлүктүң тергиин эмнелгези” дээш 1 млн рубльдиң сертификадын 1 дугаар республика эмнелгезинге тывыскан.