07.12.2023
Тываның Баштыңы Владислав Ховалыг корму-чурум камгалаар органнарның удуртукчуларның киржилгези-биле террорга удур комиссия база оперативтиг штабтың каттышкан хуралын эрттирген. Чаа чылдың байырлал хүннеринде айыыл чок чорукту хандырары - хуралдың кол айтырыы болган.
Транспорт инфраструктуразының, одалга-энергетика комплекизиниң, амыдырал-хандырылга болгаш социал ужур-дузалыг объектилерниң террорга удур камгалын бедидер талазы-биле илеткелдерни дыңнаан.
Республикада террорисчи айыыл кудуку черде дээрзин комиссия кежигүннери демдеглээн. Ындыг болзажок, украин тускай албаннарның болгаш даштыкы шивишкин бөлүктерниң талазындан айыыл күштелип турар. Чурттакчы чонга сагыш-сеткил хөлзээшкинин үндүрери-биле, объектилерде мина салып каан дугайында Интернет-террористерниң телефонга меге кыжаныгларлыг халдаашкыннары бо-ла болур апарган. Бо чылын социал албан черлериниң база күрүне органнарының электроннуг адрестеринче 16 дыңнадыг келген, терроржу болуушкуннар дугайында меге 9 дыңнадыгны бүрүткээн.
ТР-ниң ИХЯ октябрь төнчүзүнге чедир, терроржу болуушкун дугайында меге дыңнадыг таратканы дээш харыысалга көрдүнген 19 кеземче херээн РФ-тиң КХ 207 чүүлү-биле оттурган.
«Тускай шериг операциязының үезинде, чурттуң аңгы-аңгы регионнарында ниитилелди божаңнадыр оралдажыышкыннар бо-ла демдеглеттинип турары чажыт эвес. Билдингир мессенджерлерни дайынчы хөделиишкиннерниң түңнелдериниң дугайында азы терроржу актылар бооп болурнуң дугайында фейк медээлер нептередиринге ажыглап турар. Информастыг-аналитика системаларынга мониторинг бооп болур айыылдарны дораан илередип турар. Бир ындыг чоруктуң чүгле каналдарының администраторларын эвес, а регионда олар-биле харылзажып, ындыг чаттарга ону улаштыр таратчып турган хамаатыларны тодараттынган. Ол бүгүнү үзе шаап турар» - деп, В. Ховалыг бодунуң блогунда бижээн.
Тываның эрге-чагыргазы регионда айыыл чок чорукту база турум байдалды хандырар дээш амыдырал-хандырылга, одалга-энергетика болгаш орук комплекизиниң объектилериниң айыыл чок чоруун доктаамал бедидип турар. Чурум тудар ведомстволарның хууда составы, хуу камгалал черлериниң ажылдакчылары, улусчу дружиналар болгаш өске-даа хөй-ниити каттыжыышкыннарының кежигүннери байырлал хүннеринде чоннуң айыыл чок чоруун магадылаары-биле планныг хемчеглерни доктаамал чорудар. Республикаже чажыт арага киир сөөртүрүн болдурбазы-биле орук-патруль албанының «Ак» биле «Шивилиг» постуларынга контролюн күштелдирер.
Россияның ОБЯ ТР-де кол эргелели 2023 чылдың декабрь 4-тен 2024 чылдың январь 9-ка чедир массалыг хемчеглер болур база чаа чылдың чазылдырар техниказы садып турар черлерге өрт айыыл чок чоруун хандырары-биле «Чаа чыл» профилактиктиг операцияны эрттирер. Өрт камгалалының инспекторлары байырлал хъемчеглери болуп эртер өөредилге болгаш культура объектилерин кичээнгейде алган.