Тываның спортчузу Саян Хертек Арменияга болуп эрткен самбога делегей чемпионадынга алдынны чаалап алган

Ноябрьның 10-12 хүннеринде Ереван хоорайга самбога делегей чемпионады болуп эрткен. Саян Хертек түңнел салыгда Грузияның мөгези Вахтанг Чидрашвилини 2:0 сан-биле тиилээн. Тыва Республиканың Баштыңы Владислав Ховалыг арыг тиилелгези-биле спортчуга байырын чедирип, бодунуң блогунда мынча деп бижээн: «Саян, сен – Тываның болгаш бүгү Россияның чоргааралы-дыр сен!». 

Россияның Президентизи Владимир Путинниң бодалы-биле, самбо – национал спорттуң төлептиг чедиишкини-дир дээнин база губернатор демдеглээн. Ынчангаш российжи спортчунуң тиилелгези – черле чаңчыл болу берген түңнел-дир.

Саян ам делегей чемпионаттарының үш дакпыр тиилекчизи апарган. Российжи самбочу ооң мурнунда 2017 база 2022 чыларда чемпионнаан. Оон аңгыда Хертек делегейниң бирги чери дээш маргылдааларда ийи мөңгүн, бир хүлер медальдарны чаалап алган.

Хертек биле Чидрашвили 58 кил чедир деңзилиг мөгелер аразынга самбога II Европейжи оюннарга хүрешкеш, Россияның төлээзи грузин спортчуга ойнадыпкан турган.

"Маргылдааларга, тренировкаларга спортчу мергежилин экижидип, тиилелгени чедип алыр дээш, доктаамал чаныш-сыныш чок ажылдап турган деп билир мен. Ам делегейниң үш дакпыр чемпиону болду" -  деп, Владислав Ховалыг бодунуң блогунда бижээн.

Арменияга эрткен делегей чемпионадынга российжи спортчулар нейтралдыг статус-биле хүрешкен.