Тываның Баштыңы Тыва дыл хүнү-биле республиканың чурттакчыларынга байырын чедирген

Тыва Республиканың Улустуң чогаалчызы Александр Даржайның саналдааны езугаар, 2016 чылда Тыва дыл хүнү тургустунган. Байырлал бүдүүзүнде, республикада тыва дылды кадагалап, камгалап арттырарынга болгаш сайзырадырынга тураскааткан хөй санныг темалыг хемчеглерни эрттирери чаңчыл болу берген.

Бөгүн 14 шакта Улусчу чогаадылга бажыңынга эрттирген “Тыва дыл – чоннуң өнчүзү” республика шуулганы – Тыва дыл хүнүнге тураскааткан хемчеглерниң кол болуушкуну. Бөгүнгү шуулганга тыва дыл башкылаашкынынга база ажыглалынга хамааржыр айтырыглар чугула черни ээлээн.

Владислав Ховалыг республиканың чурттакчыларга байырлыл хүнү-биле байыр чедирбишаан, тыва дылын хүндүлээрин, чугаага ону хажыт чокка ажыглаарын, тыва чогаалчыларның чогаалдарын номчуп чоруурун база ол ышкаш аныяк-өскенниң төрээн дылынга ынакшылынга оттурарын кыйгырган.

- Төрээн дылывыс – бистиң өнчүвүс база чоргааралывыс-тыр. Ооң ачызында өгбелеривистиң мерген угаадыы тоолдар база тоолчургу чугаалар-биле бисте дамчып келген. Тыва дылывыста улуг чогаалдар база театр көргүзүглери, шупту культура уран аргалары тургустунуп турар – деп, Тываның Баштыңы демдеглээн.

Тыва дылдың камгалалы база сайзыралы дээш ооң эдилекчилери харыысалгалыг деп, регионнуң удуртукчузу демдеглээн.

Тываның Чазаа республиканың эртем ниитилежилгези-биле кады сөөлгү каш чылдарда төрээн дылды камгалап кадагалаар, өзүп олурар салгалдың ийи дылын хөгжүдер талазы-биле хемчеглерни ажылдап кылып турар. Республикага дыл политиказын боттандырарының бүдүн комплекстиг хемчеглери кирген, 2024-2033 чылдарда тыва дылды күрүнеден деткиириниң болгаш сайзырадырының стратегиязын бо чылдың август 1-де хүлээп алган.

Документ тыва дылды ниитилелге ажыглалын калбартып, ооң эрге-байдалын бедидип, сөстүң нормаларын болгаш курлавырын кадагалап арттырар болгаш хөгжүдүп, тыва-орус болгаш орус-тыва ийи талалыг билингвизмни хөгжүдүп сайзыраңгайжыдарынга идигни бээр.