Тываның Баштыңы тускай шериг операциязында Төп болгаш Чөөн чүк шериг округунуң шериг албанныглары-биле ужурашкан
30.10.2023
Владислав Ховалыг Россияның чаа регионнарынга ажыл-агыйжы сургакчылаашкын үезинде, Төп болгаш Чөөн чүк шериг округдарының кезектеринде албан хүлээлгезин эрттирип турар Тываның төлээлеринге ужурашкан.
Республиканың удуртукчузу-биле ТШО айтырыгларының талазы-биле тускай төлээ Тимур Куулар, Дээди Хуралдың даргазы Кан-оол Даваа, депутат Эрес Хуурак чораан. Делегация шериг албанныгларның чагыы езугаар техниктиг дериг-херекселдерни саткаш, кезектеринге чедирген.
Дайынчы даалгаларны эрес-дидим күүседип турар чаңгыс чер чурттуглары-биле база катап ужурашканынга өөрээнин ол бодунуң блогунда бижээн. Дайынчылар төрээн Тывазынче чалбырааштыг изиг байырын дамчытканнар.
Тускай техника кылдыр квадрокоптерлер, дроннар тудукчулары, харылзаа дериг-херекселдери дээш, өске-даа чугула херек чүүлдерни барып дамчыткан.
Тываның төлээлери немелде техниктиг дериг-херекселдерни доктаамал чедирип берип турарын айтыылыңар. Оолдарның албан эрттирип турар черлеринден баш бурунгаар чагыгларны чыыр. Бистиң республикадан шупту дайынчыларга дузалажыры-биле аңгы-аңгы шериг каттыжыышкыннарынче техниктиг дериг-херекселдерни чедиштир үлештирерин кызыдып турар.
Регионнуң төлээлери техниктиг дериглерни дамчыдып чорааш, бистиң оолдар-биле ужуражып, оларның айтырыгларынга харыылаан. Колдуунда-ла эмчи үделгези, өг-бүле байдалы-биле шөлээ алыры, бот-өөредилге айтырыгларын солдаттар айтырганын Владислав Ховалыг демдеглээн. 41-ги армияның удуртулгазы база 55-ки бригаданың командири, полковник Сергей Павлович Карасёвтуң киржилгези-биле чамдык айтырыгларны ол-ла черинге шиитпирлепкенин, Тываның Баштыңы дыңнаткан.
Возврат к списку
|