Тываның Баштыңы республиканың башкыларынга күрүне шаңналдарын тывыскан

Бөгүн, октябрьның 5-те, республиканың өөредилге адырының ажылдакчыларынга Башкы хүнүнге тураскаадып күрүне шаңналдарын тыпсырының байырлыг езулалы болуп эрткен.

Тываның Баштыңы Владислав Ховалыг шаңнал тыпсырының байырлыг езулалын ажыдып, чыылганнарга байырын чедирген:
«Эң берге-даа болза, буянныг мергежилдиң төлээлери силер. Силерден, силерниң башкы арга-мергежилиңер, мерген угааныңар, шыдамыыңар, өөреникчилериңерге сагыш-сеткилиңерден кичэнгейиңер болгаш ынакшылыңардан аныяк салгылывыстың кандыг билиглерлиг болгаш мөзү-бүдүштүг улуг чуртталгаже кирери хамааржыр. Ажы-төл-биле хөй чылдарда ажылдаан башкылар бөгүн бир дугааргы бедик шаңналдарын алырынга өөрүп тур мен. Силерни үнелээр бис. Силерниң ажылыңар ниитилелге херек болгаш, кандыг-даа шаңналдарга төлептиг» - деп, Владислав Ховалыг чугаалаан.

Башкы хүнүнге алдар болдуруп Тыва Республиканың күрүне шаңналдарын байырлыг байдалда тывыскан.

Мугур-Аксының уругларның уран чүүл школазының “баян” клазының башкызы Демир-оол Салчакка, өөредилгениң хоочуну Александр Адымачига, Кызыл хоорайның М.А. Бухтуев аттыг 1 дугаар школазының физика башкызы Галина Суховага, кадыкшылы кызыгаарлыг уругларның 10 дугаар школазының орус дыл болгаш литература башкызы Тамара Курыгинага «Күш-ажылчы шылгарал дээш» деп Тыва Республиканың медальдарын тывыскан.

Кызыл хоорайның немелде өөредилге төвүнүң улуг башкызы Гульнара Чудиновских, Улуг-Хем кожууннуң Чааты суурнуң К.О. Шактаржык аттыг школазының эге класстар башкызы Зинаида Эртине «Тыва Республиканың өөредилгезиниң алдарлыг ажылдакчызы» хүндүлүг атты алганнар.

Чеди-Хөл кожууннуң Хову-Аксы суурнуң уругларның уран чүүл школазының эстрада-джаз салбырының башкызы Шолбан Куулар «Тыва Республиканың культуразының алдарлыг ажылдакчызы» хүндүлүг атка төлептиг болган.

Тыва Республиканың Баштыңының Хүндүлел бижиктерин дараазында башкыларга тывыскан:
- Кызыл кожууннуң Сукпак суурда уругларның уран чүүл школазының директору, чурулга клазының башкызы Орлан Сотпага;
- Ак-Довурак хоорайның 1 дугаар ортумак ниити билиг школазының эге класстар башкызы Татьяна Донгакка;
- Чаа-Хөл кожууннуң Чаа-Хөл суурнуң Ш.Ч. Сат аттыг ортумак ниити билиг школазының төөгү болгаш ниитилел билиглериниң башкызы Оксана Кара-Салга;
– Кызыл хоорайның 9 дугаар гимназиязының химия башкызы Артемьева Натальяга;
- Барыын-Хемчик кожууннуң Кызыл-Мажалык суурнуң 2 дугаар ортумак ниити билиг школазының эге класстар башкызы Валентина Тандар-оолга;
- Тес-Хем кожууннуң Ү-Шынаа школазының тыва дыл болгаш чогаал башкызы Алла Хертекке;
– Танды кожууннуң Сосновка школазының социал педагогу Антонина Сыратка;
- Тываның агроүлетпүр техникумунуң төөгү башкызы Ким Оюнга.

М.А. Чечен-оол аттыг олимпийжи курлавыр спорт школазының спортчу хүреш тренер башкызы Менги Монгушка, Кызыл хоорайның чамдык эртемнерни ханы өөредир 11 дугаар школазының директорнуң информатизация талазы-биле оралакчызы Павел Вороновка, Кызылдың президентиниң кадет училищезиниң башкызы Ай-Мерген Кужугетке, Тываның көдээ ажыл-агый техникумунуң тускай эртемнер башкызы Елена Мананниковага, Шагаан-Арыг хоорайның «Солнышко» деп аттыг 1 дугаар уруглар садының улуг башкызы Людмила Дажы-оолга Тыва Республиканың Баштыңының Өөрүп четтириишкинин чарлаан.