Тываның уруглар садтарының кижизидикчи башкылары өстүрген шалың акшазын ап эгелээн

Тывада башкыларның күш-ажыл төлевириниң системазын сайзыраңгайжыдар ажылдар уламчылап турар. Уруглар садтарының башкылары эде санаан база чаа немелделиг төлевирни алганын республиканың Өөредилге яамызы дыңнаткан. Тывада школа назыны четпээн өөредилге албан черлериниң башкыларынга немелде компенсацияның ортумак түңү 8,5 - 10 муң рубль болган.

Тыва Республиканың Чазаа школа назыны четпээн өөредилге албан черлериниң башкы ажылдакчыларынга шалың төлевирин өстүрер шиитпирни июльда хүлээп алган соонда, муниципалдыг тургузуглар эрге-чагыргалары тус черниң нормативтиг эрге-хоойлу баазазынче өскертилгелер киирер ажылды чорутканын сагындыраал.

Айтыышкынга даянып ажыл эгелээн болганда, башкылар сентябрьның чаа немелделиг шалың акшазын алыр ужурлуг деп, Тываның Баштыңы Владислав Ховалыг сагындырган. «Школа назыны четпээн өөредилге албан черлериниң башкы ажылдакчыларының шалыңын өстүрер дээш күжениишкиннерни салып турар бис – деп, баштың чугаалааш, демдеглээн – Кижизидикчи мергежилдиң адын көдүрүп, аныяктарга башкының профессионал оруун шилип алырынга идигни берип, ажылынга чаартыкчы аргаларны ажыглаары чугула».

Нормативтиг эрге-хоойлу актыларынче киирген өскертилгелер күш кирген: школа назыны четпээн өөредилге албан черлериниң кижизидикчи башкыларынга компенсация немелдезин 3-тен 50 хуу чедир көдүрген. Оон аңгыда, өөредилге чорудуунуң аайы-биле уругларның назы-хары болгаш хууда онзагайын көрүп, бөлүкке сайзырадыр чүүлдерни тургусканы дээш 3 хуу хемчээлдиг чаа немелдени киирген.

Өстүрген шалың төлевири чүгле башкы ажылдакчыларынга хамааржырын өөредилге яамызы дыңнаткан. Уруглар садтарының арткан ажылдакчыларынга шалың төлевириниң өзүлдези Россия Федерациязының Чазааның тургускан графиги езугаар болур.

Ведомствонуң специалистери өөредилге албан черлериниң шалың акшазын үе шаанда төлеп турарынга, шалың төлевириниң тускай сорулгалыг көргүзүглерин чедип ап турарынга мониторингини ай санында кылып турарын Өөредилге яамызы дыңнаткан.