Балгазынның школачы арга-арыг ажыл-агыйы российжи чыышка чедиишкинниг киришкен

Cентябрьның 25-29 хүннеринде, Москва облазында Левково кадыкшылга комплекизинге, школачы арга-арыг ажыл-агыйларының VII бүгү-российжи съездизи болуп эрткен. Россияның 65 регионундан школачы арга-арыг ажыл-агыйының 250 хире кежигүннери база 100 хире удуртукчулары аңаа киришкен.

Тыва Республиканы Балгазынның школачы арга-арыг ажыл-агыйының удуртукчузу Юлия Тукурееваның баштааны тоску классчылары төлээлеп киришкеш, команда аайы-биле ийиги черни ээлээн.

Съездиниң организаторлары киржикчилерге чымыштыг программаны белеткээн. Бирги хүнүнде Россияның арга-арыг ажыл-агыйының ведомствозу – Авиа арга-арыг камгалал черинге экскурсияладып, арга-арыг өрттерин өжүрер техника аймаан сонуургадып, ону канчаар ажыглаарын таныштырган. Ук албан чериниң специалистери оолдар, уругларга мастер-класстарны эрттирген.

Съездиниң байырлыг ажыдыышкынында киржикчи командалар боттарын таныштырган. Ол-ла хүн лекцияларны эрттирип, хову ажылдарын организастаан. Оолдар, уруглар мастер-класстарда болгаш хову кичээлдеринде арга-арыгның байдалын, амылыг бойдусту камгалаарының, арга-арыгны катап өстүрүп-көвүдериниң билиглерин быжыглап, практиктиг кичээлдерни алган. Кичээлдер үезинде оолдар, уруглар оларга быжыглаан участоктан “Арга-арыгны кады камгалаалыңар!” деп төлевилелди таныштырып, камгалаарынга херек материалдарны чыып, ыяштар өзүмнерин тарып олурткан.

Бүгү-российжи чыыш үезинде, Балгазынның школачы арга-арыг ажыл-агыйының киржикчилери “Арга-арыгны кады камгалаалыңар!” деп командалыг төлевилелин чедиишкинниг камгалап, арга-арыг экосистемазын камгалаарының, бойдус байлаан шын ажыглаарының талазы-биле боттарының арга-сүмезин саналдап, шыырак билиглиин бадыткааннар.

Съездиниң байырлыг хаашкынында өөреникчилерге дипломнарны болгаш белектерни, а удуртукчуларынга мергежилин бедиткен дугайында шынзылга бижиктерни тывыскан.

Бөгүн Россияда 40 муң хире кежигүннү эвилелдээн 1830 школачы арга-арыг ажыл-агыйлары бар. Тываның школачы арга-арыг ажыл-агыйлары 1967 чылдан бээр ажылдап турарын сагындыраал. Шимчээшкинниң киржикчилери арга-арыг камгалаар, ыяштар өзүмнери тарып олуртур, куштар уялары кылыр дээн ышкаш, бойдус камгалалының хемчеглеринде идепкейлиг киржип турар.