Тывада «Мен – башкы мен» төлевилелдиң киржикчилери компенсация төлевири кылдыр деткимчени алыр

Тывада Башкы болгаш дагдыныкчының чылынга тураскааткан Улуг башкылаашкын неделязында аныяк башкыларның «Чаа салгал» шуулганы бир дугаар болуп эрткен. «Мен –башкы мен» регионалдыг программа киржикчилери болур 86 башкыга 174418 рубль түңнүг чаңгыс катап бээр компенсация төлевириниң сертификаттарын байырлыг байдалга тывыскан.

Башкы мергежилди чедип алган 250 ажыг доозукчу чаа өөредилге чылында башкыларның болгаш кижизидикчи башкыларының одуруунда немешкенин Тываның Баштыңы Владислав Ховалыг чугаалаан. «Өөредилге» национал төлевилел боттанылгазы-биле физика, химия база биология эртемнеринге чурагайлыг лабораториялар-биле школалар дериттингени дыка эки. Салдынган сорулгаларын чедип алырынга дузалажыр кылдыр аныяк башкыларга дагдыныкчыларны быжыглаан» - деп, Тываның Баштыңы бодунуң блогунда бижээн.

ССРЭ-ден Тывага бир дугаар орус башкыларның келгенинден бээр 100 чыл бурунгаар тургустунган дагдыныкчы чоруктуң ужур-чаңчылдарын кадагалап арттырып алганы дээш, Владислав Ховалыг башкылар ниитилежилгезинге четтиргенин илереткен. Ол башкылар бот-догуннаан күрүне турган республикага улусчу өөредилгениң эге таваан салганнар. Оон бээр кандыг-даа айтырыгга харыылаптар, амыдырал чуртталгаже шын орукту айтып, арга-сүмезин бериптер башкы кижиге улуг хүндүткел чон аразынга тургустунган.

Республика бөгүнгү башкылардан база ындыг миссияны манап турар. Оларны деткээн– аңгы-аңгы күрүне программаларындан база конкурстардан деткиишкиннер база ипетока алырынга чиигелделер дээш, бүдүн комплекстиг хемчеглер бар. Үш чыл иштинде «Мен – башкы мен» республика төлевилели-биле 150 хире аныяк башкы компенсация төлевириниң программазы-биле дузаламчыны алган.