Тывада уруглар аразында ОРВИ-ден аарыыр чорук көвүдээн

Росхереглел хайгааралының ТР-де эргелели сөөлгү үш неделяда республика девискээринде ОРВИ-ден аараан кижилер саны көвдеп турарын дыңнаткан. Специалистер эпидемиологтуг байдалга четпес-даа болза, аарыыр чорук көвүдээнин демдеглээн. Тываның эмнелге организацияларынга ОРВИ-лээн 51 таварылга демдеглеттинген, ооң мурнунда неделяда 28 турган. Өзүлде - 82 хуу.
Неделяның статистиказында ийи харга чедир чаштарның хөй аарып турарынче эмчилер кичээнгейни углаан. 15 харда өрү база улуг улус аразында чүгле сес кижи аараан.
Эрткен неделяда чаа коронавирус халавырындан ийи кижи аараанын лабораторлуг шинчилелдер илереткен: Кызыл хоорайда бичии чаш база муниципалдыг албан чериниң ажылдакчызы. Сөөлгү үш айда Тывада аараан бирги таварылгалар болур. Июньнуң 19-тан 25-ке чедир COVID-19-тан аарааны лабораторияга бадыткаттынган ийи таварылганы сөөлгү катап бүрүткеп, тарап нептеревээнде эмнээнин сагындыраал.
Сентябрь эгезинде республиканың поликлиникаларында сезоннуг грипптен камгалал тарыышкын эгелээн. Бөгүнге чедир 33 муң кижи тарыткан, планда - 199,5 муң кижи. Эпидемиологтар ажылдың темпизин улгаттырарын эмнелгелерге сүмелээн.
Чурттакчы чоннуң 60 хуузу тарылганы алыр ужурлуг. Тарыышкынның национал календары езугаар, бюджет акша-хөреңгизи-биле кадык камгалал, өөредилге, социал адыр ажылдакчыларын, студентлерни, шеригже кыйгыртып турарларны, хоочураан аарыгларлыг база 60 хардан өрү назылыг кижилерни тарыыр.
Бичии уругларга, улуг кижилерге, назылап кырааннарга, иштиг херээженнерге, айыылдыг бөлүкке хамааржыр улуска дээш, тарыыр эмнер элээн каш хевирлерлиг. Тываның кадык камгалал яамызы сентябрь 26-да соонда чаа партия кээрин манап турар.
Республиканың консультативтиг-диагностика төвүнге, Республиканың 1 дугаар, Республиканың уруглар эмнелгелеринге, төп кожуун эмнелгелеринге, кожууннар аразының эмнелге төптеринге күзелдиг кижи бүрүзү гриппке удур тарылганы салдырып ап болур.
Грипп халдавырынга удур эң-не дээштиг камгалал - тарылгада деп, эмчилер сагындырып турар. Специалистер соокка алыспас дизе, холдарны чуп, өрээлдерни агаарладып, хөй кижилер чыылган черлер барбазын, шын чемненирин сүмелеп турар.