Тывада республиканың шахтёрларын шаңнаар байырлыг ёзулал болуп эрткен

Бөгүн Тываның Чазаанга, Шахтер хүнүнүң бүдүүзүнде, республиканың хөмүр-даш үлетпүрүнүң ажылдакчыларын шаңнаар байырлыг езулал болуп эрткен.
Тываның Баштыңы Владислав Ховалыг аңаа киришкеш, республика үлетпүрүнүң болгаш бүгү экономиказының стратегтиг адырының бирээзи болур хөмүр-даш үлетпүрүнде ажылдап турар кижилерниң карак-кызыл күш-ажылынга болгаш улуг чедиишкиннеринге алдар болдурган байырлал-дыр дээрзин демдеглээн.
«Оларның амыр эвес күш-ажылы бистиң өг-бүлелеривиске чылыгны сөңнеп, сеткилден өөрүп четтириишкинниң болгаш хүндүткелдиң мөгейиинге төлептиг. Ук адырның ажылдакчылары үлетпүр бүдүрүлгезиниң, социал адырның болгаш чуртталга-коммунал ажыл-агый объектилериниң турум ажылдаарын бүзүрелдии-биле хандырып, дыка хөй чылдарның дургузунда энергетиканың айыыл чок чоруун быжыглаарынга улуг үлүүн киирип турарлар. Хөмүржүлеривис-биле билчилгелиг кады ажылдап, ол адырны деткиирин кызыдып чоруур бис» -деп, Владислав Ховалыг чугаалаан.
Байырлыг хуралда, регионнуң удуртукчузу Тываның Дээди Хуралының даргазы Кан-оол Даваа-биле кады күрүне шаңналдарын тывыскан.
Хөмүр-даш үлетпүрүн хөгжүдеринге хууда үлүг-хуузу, амыдыралчы идепкейлиг туружу дээш РФ-тиң энергетика сайыдының Өөрүп четтириишкин бижиин «Тываның даг-руда компаниязы» КХН-ниң БелАЗ чолаачызы Бюрбю Базыр-Садыевич  Монгушка тывыскан.
Хөмүр-даш үлетпүрүн хөгжүдеринге хууда үлүг-хуузу болгаш хөй чылдарда үре-түңнелдиг ажылы дээш,  «Шахтер хүнүнүң 75 чылы»  «Россияда хөмүр тывыжының 300 чылы» хөрек демдээ-биле дараазында ажылчыннар шаңнаткан:
Иван Сергеевич Мелехин – «Межегейхөмүр хөмүр-даш компаниязы» КХН-ниң 5-ки разрядтың изекчизи;
Алдын Март-оол оглу Ондар – «Межегейхөмүр хөмүр-даш компаниязы» КХН-ниң чер адаанда ажылдарның 3-кү разрядтың электрослесары;
Аржаан Александрович Оюн – «Межегейхөмүр хөмүр-даш компаниязы» КХН-ниң маркшейдер ажылдарында дагжызы;
Ольга Николаевна Володина – «Тываның даг-руда компаниязы» КХН-ниң саң-хөө директору;
Александр Иванович Алексеенко – «Тываның даг-руда компаниязы» КХН-ниң өрүмнээр дериг-херексел машинизиниң дузалакчызы;
Аяс Алексеевич Тюлюш - «Тываның даг-руда компаниязы» КХН-ниң БелАЗ чолаачызы;
Айдыс Николаевич  Ховалыг – «Тываның даг-руда компаниязы» КХН-ниң экскаватор машинизи.
«Тываның даг-руда компаниязы» КХН-ниң энергомеханика албанының кол энергетиги Дмитрий Николаевич Конузелевка ак сеткилдиг күш-ажылы дээш Тыва Республиканың Баштыңының Өөрүп четтириишкинин тывыскан.
«Тываның даг-руда компаниязы» КХН-ниң өөредилге пунктузунуң начальниги Светлана Витальевна Лини ак сеткилдиг күш-ажылы дээш Тыва Республиканың Баштыңының Хүндүлел бижии-биле шаңнаан.
«Тываның даг-руда компаниязы» КХН-ниң 7-ги разрядтың экскватор машинизи Владислав Юрьевич Сат хөмүр-даш үлетпүрүнге хөй чылдарда үре-түңнелдиг ажылы дээш «Тыва Республиканың алдарлыг ажылдакчызы» хүндүлүг атка төлептиг болган.