Россияның күрүне тугунуң хүнүнде, Тываның найысылалынга Россия Федерациязының бичии хамаатыларынга паспорттарны тывыскан

Арат шөлүнге, Россия Федерациязының Күрүне тугунуң хүнүнге тураскааткан байырлалда, Россия биле Тываның күрүне туктарын көдүрер байырлыг езулалда, республиканың беш бичии чурттакчызынга Россия Федерациязының хамаатызының паспорттарын тывыскан. Тыва Республиканың Баштыңы Владислав Ховалыг тускай шериг операциязының зоназынга албан хүлээлгезин күүседиринге шылгараан эмчилерге болгаш корум-чурум камгалаар органнарның ажылдакчыларынга күрүне шаңналдарын тывыскан.

Арат шөлүнге күрүне туктарын көдүрер байырлыг езулалга шериг кезектериниң, корум-чурум камгалаар органнарның база республиканың өөредилге албан черлериниң ажылдакчылары чыскаалган.

Тыва Республиканың шериг комиссарының албан хүлээлгезин күүседип турар майор Ян Лукевич езулалды удурткан, Тываның күрүне университединиң шериг-өөредилге төвүнүң төлээлеринден тук тудар бөлүк Россия Федерациязы база Тыва Республиканың ыдык ырыларының үделгези-биле Россия Федерациязы биле Тыва Республикаларның күрүне туктарын киискиткен.

Тываның Баштыңы Владислав Ховалыг база ТР-ниң Дээди Хуралының даргазы Каң-оол Даваа байырлалдың киржикчилеринге чугула күрүне байырлалдары-биле байыр чедирген.

Владислав Ховалыг Россияның бот-догуннаашкынын болгаш хамаарышпас чоруун илереткен Россия Федерациязының тугунуң онзагай ужур-утказын айыткан:

- Бөгүн чурттуң тугу Россияның хөй националдыг бүгү чонун эрткен, амгы болгаш келир үелерде каттыштырып, хей-аъдын көдүрүп чоруур. Амгы үеде бистиң ажы-төлүвүстүң келир үезин камгалаан тускай шериг операциязының киржикчилерин деткиири-биле холунда триколорну туткаш, Тываның чурттакчылары база бүгү чурт сырый каттажыпкан. Өзүп олурар салган Төрээн чуртунуң күрүне тугунуң адаа-биле чаа-чаа бедиктерге чедип, делегей деңнилнге ооң алдар адын камгалап, хей-аът кирип, тиилээр онзагай хүлээлгелиг – деп, регионнуң удуртукчузу чыылганнарга чугаалаан.

Республиканың бирги удуртукчулары тук көдүрүүшкүнүнүң соонда, Россия Федерациязының чалыы хамаатыларынга паспорттарны тывыскан.

Кызылдың 15 дугаар лицейиниң 8 “б” клазының өөреникчизи Дамдын Балдан, Каа-Хем суурнуң 1 дугаар школазының 8 “е” клазының өөреникчизи Чигжета Хаджики, Кызылдың 4 дугаар школазының 7 “а” клазының өөреникчизи Наталья Чепрасова, Кызылдың 16 дугар лицеиниң 8 "д” клазының өөреникчизи Данил Торе-Монге база Кызылдың 7 дугаар школазының 8 ”а” клазының өөреникчизи Алина Бады тергиин өөредилгези база үлегерлиг чуруму дээш, Россия Федерациязының хамаатызының бирги документизин байырлал хүнүнде  алганнар.

Полицияның подполковниги Орлан Маадыр-оолович Саая, полицияның подполковниги Эккер Эрес-оолович Мугурну албан хүлээлгезин күүседип тура, эрес-дидим, коргуш чок чоруу дээш, Россия Федерациязының Президентизиниң чарлыы-биле “Хөй-ниитиниң чурумун камгалаарынга шылгарал дээш” медаль-биле шаңнаан.