Владислав Ховалыг Махачкалада АЗС-га частыышкындан мөчээн кижилерниң чоок улузунга кажыыдалын илереткен

Тываның Баштыңы бодунуң өмүнээзинден база республиканың хөй националдыг чонунуң мурнундан Дагестан Республиканың Баштыңы Сергей Алимович Меликовка, Дагестанның акы-дуңма чонунга ханы кажыыдалын илереткен. Владислав Ховалыг бо берге үеде бүгү чурт силер-биле кады дээрзин демдеглеп, когараан кижилерге дүрген сегиирин күзээн.
Август 14-түң кежээзинде Махачкала хоорайның кыдыында автосервиске өрт эгелээш, от чанында заправкаже дамчый бээрге, частыышкын болган. Сөөлгү дыңнадыгдан алырга, мөчээн кижилерниң саны хөй.
Август 15-те Махачкаланың эмнелгелеринде когараан 63 кижи чыдар, оларның 16-зы бичии уруглар. Он бир кижиниң, ооң санында ийи бичии уругнуң байдалы берге. Оон аңгыда 17 кижи амбулаторлуг эмчи дузазын алган.