Аныяктар хүнүн Тываның найысылалынга ийи хүн дургузунда солун программалар-биле демдеглээр

Тываның Аныяктар херектериниң талазы-биле агентилел республиканың найысылалынга Аныяктар хүнү канчаар эртерин дыңнаткан. Чылдың-на июньнуң сөөлгү субботазында Россияда демдеглеп турар ол хүн бо удаада 24-те таварышкан. Байырлал программазының кол хемчеглери пятницада, июньнуң 23-те хоорайның алды аңгы шөлүнге: төпте Арат база Арбат шөлүнге, Аныяктар сесерлиинге, Советтиг Тываның 5 чылы стадионга, “Азия төвү” скульптура комплекизиниң девискээринге болуп эртер.

Сес аңгы угланыышкынында планнаттынган хемчеглерден кижи бүрүзү сонуургаан чүүлүн шилип алыр: карьера, аргалар, креатив, хөгжүм, трендилер, чырыдыышкын, буянныг чорук база амыдыралдың кадык овур-хевири.

Июнь 23-те 11 шакта, Арат шөлүнге «Россия – арга-шыдалдың чурту» шөлдүң таныштырылгазы-биле Ажылга хаара тударының бүгү-российжи ярмарказы база «Большая перемена», «Твой Ход», «Росмолодежь.Гранты» конкурстар эгелээр. Башкының болгаш дадыныкчының чылынга тураскаадып Бүгү-российжи аныяктар хүнүнүң арт-объектизин тургузар. Арбат шөлүнге «Hande Made» маркет ажыттынар, а Аныяктар ордузунга «ПрофУESиЯ» ажылчын мергежилдер шуулганы ажылын эгелээр.

Арат шөлүнге хемчеглер 16 шакта база уламчылаар. Тываның билдингир блогерлери-биле фан-ужуражылгалар, тюнингилиг автомобильдер, мотоциклдер, спорткарлар делгелгези, байырлал концерти база дискотека 21 шакка чедир аныяктарны хаара тудар.
Июньнуң 24-те – байырлалдың чымыштыг ийиги хүнү. “Кады бис” ачы-буян фестивалы Аныяктар сесерлиинге 11 шакта эгелээр. Ол-ла шакта Аныяктар ордузунга Чырыдыышкын шөлү ажыттынар, күзелдиг кижи бүрүзү бодунуң өзүлдезинге ажыктыг лекцияларны халас дыңнап болур.

14-18 шакта Аныяктар сесерлиинге чадаг-тергеге айыылдыг аргалар кылырынга, воркаутка республика маргылдаазы. Самчылар Dance Battle талазы-биле чижир, «Чурумалдыг Кызыл» граффити конкурстуң тиилекчилерин шаңнаар, Bohp-chic аянынга дириг хөгжүм кежээзи болуп эртер.

«Азия төвү» скульптура комплекизинге 17 шакта эгелээр «Азия төвүнде доозукчуларның бөлүк сылдыстары» бал - байырлалдың эң чараш кезээ. Советтиг Тываның 5 чылы стадионга 18 шактан 22 шакка чедир 2000 чылдарның супер-дискотеказы программа-биле Аныяктар хүнүнүң программазы доостур.