Кызылда уругларның чаа республика эмнелгезин тудуп эгелээн

«Уруглар эмчи дузазы көргүзер амгы үениң инфраструктуразын тудуп, уругларның кадык камгалалын сайзырадыры» федералдыг төлевилел күүселдези-биле чыдар эмнелгелиг болгаш поликлиникалыг уруглар эмнелге комплекизиниң төлевилелин ажылдап кылгаш, камгалаан. Республиканың уруглар эмнелгези биле уругларның соматика салбырының чоогунга тудар 150 оруннуг эмнелге албан черин Россияның Кадык камгалал яамызы-биле дугурушкан. Тудуг ажылдары 2024 чылдың төнчүзүнде доостур.
Кызыл хоорайда Кечил-оол кудумчузунга турар объектини тудуп үндүрер шөлдү белеткээнин Кадык камгалал яамызы дыңнаткан. «Сибпромгрупп» АН-ның ажылдап кылганы төлевилел амгы үеде күрүне экспертизазын эртип турар.
Республиканың 1 дугаар эмнелгезиниң уругларга кезиишкин салбыры чаа оран-сава тудуу доосту бээрге, республиканың уруглар эмнелгезиниң структуразынче каттыжар. Салбырның баазазынга ийи кезиишкин залдары ажылдаар.
Объектиниң дөзевилелинче база тудуушкунунче 1,9 млрд рубль көрдүнген, республика 49 млн рубльди кады акшаландырар. Тудуг объектизин «Восток» КХН тудар.
2021 чылдың чайынында, Владислав Ховалыг республика Баштыңының албан хүлээлгезин күүседип тургаш-ла, РФ-тиң кадык камгалал сайыды Михаил Мурашко-биле ужурашканының түңнелинде, уругларның республика эмнелгезиниң чаа оран-савазын тудар ажылдар эгелээнин сагындыраал. Ийи тала объектини тударда, мед-техниктиг негелделерни чедир ажылдааш, федералдыг ведомство-биле дугуржурун чугаалашкан турган. Ужуражылганың түңнелинде Мурашконуң даалгазы-биле РФ-тиң кадык камгалал яамызының штаттан дашкаар кол педиатр специализи Татьяна Куличенко келгеш, уруглар эмнелгезиниң оран-савазы турар черге чөпшээрелди берген.