Владислав Ховалыг РФ-тиң камгалал сайыды Сергей Шойгуга төрүттүнген хүнү-биле байырын чедирген

Республиканың Баштыңы Владислав Ховалыг социал четкилерде бодунуң блогунга Сергей Күжүгетович Шойгунуң 68 харлап турары-биле байырын чедирип, республиканың шупту чурттакчылары хүндүткелдиг чаңгыс чер чурттуунга чаагай күзээшкиннерни йөрээп турарын дамчыткан.
“Шойгу – Тываның база бүгү чурттуң чоргааралы. Ооң чуртунга кылган ажыл-ижин ОБЯ-ны тургузарындан эгелээш, бистиң шериивистиң катап тургустунарынга чедир үнелел бээри ындыг амыр эвес. Ол амдыызында канчаар-даа аажок улуг ажыл-ишти кылып чоруур. Ынчалза-даа ол улуг ажыл-херек Россияда болгаш оон дашкаар хөй-хөй кижилерниң чуртталгазын өскертипкен болгаш, ам-даа уламчылап турарын ыяк билир бис. Меңээ эң-не кайгамчык чүүл – Сергей Күжүгетович ындыг улуг хемчээлдиг ажылды кылып чорааш безин, анаа кижилерге ажык, бодунуң төрээн чер-чуртунуң берге айтырыгларынга кичээнгейлиг, төлептиг оглу болуп, бичии-даа утпайн чоруур. Аңаа быжыг кадыкшылды, күштүг болурун болгаш бүгү-ле бодап чоруур күзелдери бүдүп чоруурун күзедим!” – деп, Владислав Ховалыг бодунуң блогунда бижээн.