Тускай шериг операциязының киржикчилерин деткиир күрүне фондузунуң регионалдыг салбыры июньнуң 1-ден Тывага ажылын эгелээр

«Ада-чурттуң камгалакчылары» тускай шериг операциязының киржикчилерин деткиир күрүне фондузунуң Тывада салбырын ажыдарынга белеткел дооступ турар.
Тываның Баштыңы Владислав Ховалыг регионалдыг салбырны ажыдарынга хамаарышкан бүгү-ле хемчеглерни шыңгыы контрольда тудуп, фондунуң ажыл-чорудулгазынга тускайлаан оран-савада септелге ажылдары кайы хире чоруп турарын хынап четкен. Кызыл партизаннар кудумчузунда 30 дугаарлыг бажыңда административтиг оран-саваның септелгези доозулган. Төлевилелдиң федералдыг брендбугунга дүүштүр ону шимеп белеткеп турар.
«Оран-саваның даштын тоолчаан тыва эки турачы, Ада-чурттуң улуг дайынының киржикчизи Вера Чульдумовна Байлактың чуруу-биле каастаары чөптүг» - деп, Владислав Ховалыг бодунуң блогунда демдеглээн.
Тыва Республикадан квалификация негелделери езугаар шилиттинген 18 специалист майның 13-тен эгелеп Новосибирск хоорайда Россияның улус ажыл-агыйы болгаш күрүне албанының академиязында «Ада-чурттуң камгалакчылары» тускай шериг опреациязының киржикчилерин деткиир күрүне фондузунуң «Социал координатор» программазында өөренип эгелээн. Чогуур белеткелди эрткен соонда, салбырның ажыл-чорудулгазы-биле регионда тускай шериг операциязының киржикчилерин болгаш оларның өг-бүлелерин деткиир айтырыгларны дүүштүрүп эгелээр.
Майның төнчүзүнде чурттуң өске регионнарында салбырлар ажыдыышкыны-биле деңге Тывада фондунуң ажыдыышкыны болуп эртер. Июньнуң 1-ден фонд боттуг ажылынче кирер.
Чурттуң Президентизи Владимир Путинниң даалгазы-биле, бүгү Россияда ышкаш Тывадада база «Ада-чурттуң камгалакчылары» тускай шериг операциязының киржикчилерин деткиир күрүне фондузунуң килдизи ажыттынарын сагындыраал. Регионалдыг социал дүүштүрүлге албаны ооң ажылын хандырар. Фондунуң кол сорулгазы - тускай шериг операциязының киржикчилеринге болгаш хоочуннарынга көрдүнген эмчи болгаш социал реабилитация, эм-таң хандырылгазы, психологтуг дуза, реабилитацияның техниктиг арга-хевилери болгаш санаторлуг-курорт эмнээшкини дээш, өске-даа деткимче хемчеглерин алырынга дузаны кадар.