Майда Тывага сайгарлыкчы чоруктуң неделязы болуп эртер

Чыл санында майның 26-да демдеглеп турары Российжи сайгарлыкчының хүнүнге тураскааткан Сайгарлыкчы чорук неделязы майның 17-29 хүннеринде болуп эртер. Бо удаада неделяның кол болуушкуннары болурр ажыл-агыйжы хемчеглерни бүдүн майның дургузунда планнаанын регионнуң экономиктиг хөгжүлде болгаш үлетпүр яамызы дыңнаткан. Бодунуң бизнезин эгелеп азы шуудадып алыксаан кижилер Сайгарлыкчы чорук неделязында бизнестиң янзы-бүрү адырларындан ажыктыг билиглерни, практиктиг кичээлдерни ап, коллегаларының арга-дуржулгазын солчуп, улуг хей-аътты алыр аргалыг.
Келир четвергде, майның 11-де, ТР-ниң Сайгарлыкчы чорук деткиир фондузу биче болгаш ортумак бизнес субъектилеринге саң-хөө деткимчелериниң дугайында семинарны күзелдиг кижилерге эрттирер. «Промсвязьбанк», «Сбербанк», «Совкомбанк», «Росбанк», «Почта Банк», «Россельхозбанк», ТР-ниң Магадылал фонду база «Мой бизнес» төптүң төлээлери хемчегге спикерлээр. Дыңнакчылар биче болгаш ортумак сайгарлыкчы чорукка саң-хөө деткимчезиниң, чээли болгаш микрозаймнар алыр аргаларының, бизнестиң дээштиин бедидериниң дугайында билип алыр. Семинар Тыва эки турачылар кудумчузу, 18 бажыңда коворинг-төпке 15:00 шакта болуп эртер.
Сайгарлыкчы чорук неделязының кол хемчеглеринде вебинарлар, «РТ-де мээң бизнезим» төпке ажык эжиктер хүнү, «Лидерниң бодалы» бизнес-тренинг, «Регионалдыг брендилерни бүрүткээри» деп темага семинар кирген. РФ-тиң Күрүне Думазының депутады, «Бодуңнуун шилип ал» төлевилелдиң куратору Сергей Морозов-биле «төгерик стол» планнаттынган. Бодун ажыл-биле хандырттырганнарның шуулганы Аныяктар ордузунга болуп эртер. Ол ышкаш ачы-буянныг чадаг-терге чарыжын база спартакиаданы организастаар.
Тыва Республиканың Баштыңы Владислав Ховалыг-биле бизнестиң төлээлери ужуражып, Тывада биче болгаш ортумак сайгарлыкчы чоруктуң хөгжүлдезинде чидиг айтырыгларны чугаалажып, оларны кады шиитпирлээриниң аргаларын тывар. Ол ужуражылга үезинде 2022 чылдың түңнелдери-биле «Тулган сайгарлыкчы» база «Тулган экспортёр» шаңналдарының тиилекчилерин чарлаар.
Неделяның организаторлары Тываның Экономиктиг хөгжүлде яамызы биле Сайгарлыкчы чорукту деткиир регионалдыг фонд бизнес темаларын сонуургап, медээлерни хайгаарап, ажыктыг болгаш солун хемчеглерге идепкейлиг киржир кылдыр сонуургалдыг кижилерни чалап турар.