Тывада "Улусчу картофель" губернатор төлевилелиниң киржикчилериниң реестрин тургузуп турар
02.05.2023
Тываның муниципалдыг тургузуглары "Улусчу картофель" губернатор төлевилелиниң киржикчилериниң даңзызын тургуспушаан. Чогуур үрезинни сөөртүп эккээринге белен фермерлер-биле керээлерни чарып турар. Апрель 27-ге чедир, амдыызында үш чүс хире өг-бүле күрүне деткимчези кылдыр картошка үрезининче билдириишкинни киирген.
Кемероводан сайгарлыкчы Николай Живодеров-биле керээни чарган. Ол бо хүнге чедир Ак-Довурактуң чурттакчыларындан кирген чагыгны (301) хандырар. Тус черниң фермери Александр Желтухин Тере-Хөл биле Чеди-Хөл кожууннарда губернатор төлевилелиниң киржикчилерин картофель үрезини-биле хандырар. Бо хүннүү-биле, тус-тузунда 271 база 55 өг-бүле күрүне деткимчезинче билдириишкинни киирген. Таңды кожуунда - 379, Улуг-Хемде - 1288, Сүт-Хөлде – 310 өг-бүле үрезинге хереглелдиг.
Республика Баштыңы Владислав Ховалыгның даалгазы-биле, 2022 чылда «Социал картофель» биле «Картофельди – өг-бүлелерже» деп ийи төлевилелди "Улусчу картофель" губернатор төлевилели кылдыр каттыштырганын сагындыраал. Хөй ажы-төлдүг болгаш эвээш орулгалыг өг-бүлелерни деткиири талазы-биле регион чазааның кризиске удур хемчеглерниң бирээзи ол болган. Регионнуң Күш-ажыл болгаш Көдээ ажыл-агый яамыларының удуртулгазы-биле кожуун болгаш хоорай чагыргалары төлевилелди боттандырып турар.
Төлевилел боттандырылгазының доктаатканы езугаар, бир өг-бүле 25 кил картошка үрезинин база чартык кил “борщ түү” - свекла, морковь, капуста, согуна болгаш өске-даа ногаа культуразының үрезиннерин алыр. А үш болгаш оон хөй ажы-төлдүг өг-бүлелерге 50 кил картошка үрезинин бээр. Огородчулар тарып олурткан 25 кил картошка үрезининден 100 кил хире дүжүттү, а чартык кил хире ногаа үрезининден центнер ажыг ногаа дүжүдүн ажаап алыр ужурлуг.
Эрткен чылын республикада “улусчу картофель” губернатор төлевилелинге киришкен 7613 өг-бүлеге 226,8 тонна картошка үрезинин үлээн. Олар июньга чедир картошказын тарып олурткан. Чай дургузунда картошканың довураан улгаттырып, суггарып турза-даа, агаар бойдус таарымча чок болганындан дүжүт арай чегей болган. Күзүн 635030 тонна дүжүттү алган, бир өг-бүлеге онааштыр ортумаа-биле - 100 кил картошка.
Возврат к списку
|