Бо чылын Тываның чамдык чурттакчыларының бажыңнарынга 700 хире өрт медээчилерин салыр

Россияның камгалакчылар эвилелиниң Дээди чөвүлелиниң даргазы Алексей Дударев-биле Тываның Баштыңы Владислав Ховалыг ужуражып тура, бажыңнар өрттеринге база угарлыг газтан хоранналырынга удур профилактика ажылын чорударын чугаалашкан. Республиканың эрге-чагыргазы чурттаар черлерни өртке удур системалар-биле дериир регионда ажылды ам-даа күштелдирер. Ышталы бергенин дыңнадыр база кургаг чүүл-биле өжүрүптер боттары ажылдаар модульдарны ажыглаарының аргазын чазакта өөренип көрүп турарын губернатор дыңнаткан.
Амгы үеде Тывада «2021-2023 чылдарда Тыва Республикада хамаатыларны социал деткимче» күрүне программазы чурттакчы чоннуң чамдык бөлүктериниң квартираларынга автономнуг өрт дыңнадыкчыларын садып алыр акша-хөреңгини көрүп турар. Бир эвес ыш тыпты бээр болза, дыңнадыкчылар ыыткыр сигналды берип, удуп чыдар кижини безин оттуруптар.
Хөй ажы-төлдүг, эвээш орулгалыг өг-бүлелерге, шимчей албас болгаш чааскаан чурттап турар хамаатыларга, социал айыылдыг байдалда азы амыдыралдың берге байдалында таварышкан өг-бүлелерге, «Чаа сорук» база «Аныяк өг-бүлеге кыштаг» күрүне программаларының киржикчилери өг-бүлелерге өртке удур системаларны халас салыр. 2021 чылда программа боттанылгазындан ниитизи-биле 113 муң рубль акша түңүнге 326 автономнуг өрт медээчилерин эптеп салган. «Камгалалдың оттурукчузу – өрт үезинде бир дугаарында оттуп келир» ачы-дуза акциязының үезинде чыгдынган акша-хөреңгиге 280 датчикти саткан.
Күрүне политиказының күүселдезин хайгаараар Тываның Күш-ажыл болгаш социал политика яамызы тус чер бот-башкарылга органнары-биле кады деткимчениң ол хевиринге хереглелдиг өг-бүлелер даңзызын бирги ээлчегде тургузар. 2023 чылда 696 ындыг өг-бүлеге өрт медээчилерин салырынга республика бюджединге 300 хире муң рубльди аңгылаар. Чаңгыс чер-чурттугларның хөй кезииниң айыыл чок чоруун күштелдирип, ажылды дүргедедири-биле, ачы-дуза акциязын ам база уламчылаар. Өнчүнүң кандыг-даа хевириниң организациялары база сагыш човангыр хамаатылар акцияга киржип болур.
Бир эвес акша-копеек-биле шыдаптар хамаатылар бар болза, боттары квартираларынга өрт медээчизин албан салып алырын республиканың камгалал албаны сүмелээн. Өрээлге ыш тыптып келгенин дораан эскерип каар датчиктиң өртээ 300-500 рубль болур. А угарлыг газты "чыттап" каар датчиктиң өртээ 2-3 муң рубль болур.