Тыва ча адыкчылары Орёл хоорайга эрткен Россия Кубогунга мөңгүннү чаалап алган

Шимчээри багай спортчулар аразынга чаа адарының Россия Кубогу дээш маргылдаазынга тыва ча адыкчылары чедиишкинниг киришкен. Январьның 14 - 18 хүннеринде Орёл хоорайга (Орлов облазы), анаа болгаш амгы үениң чазы-биле кара адарынга хууда база командалыг медальдар дээш W1 класска мергенин шенешкен.
Орёл хоорайга маргылдаада Тываны төлээлээри-биле шимчээри багай кижилер аразында ча адарының республиканың чыынды командазындан 9 спортчу, тренер база бир үдекчи аъттанган. Бистиң спортчуларывыс анаа - классиктиг чага эки түңнелдерни көргүскен. Херээжен командалар маргылдаазынга Айда-Сай Монгуш биле Долаана Тоюндуп Краснодар крайның командазынга чүгле каш сан четпейн барган. Холушкак командалар аразынга Айда-Сай Монгуш биле Аганак Седип мөңгүн медальга төлептиг болган. Бо хевирге Бурятияның командазы алдынны алгаш барган.
Спорттуң адаптивтиг хевирлеринге республиканың спорт школазының тренерлери Виктор Алексеевич биле Чечен Доржуевна Саржат-оолдар бистиң спортчуларывысты – спорт мастеринге кандидаттарны белеткээн. Амгы үеде бо оолдар, кыстар республиканың аңгы-аңгы өөредилге черлеринде эртем-билигни чедип ап турар. Аганак Седип – Тываның техникума информастыг технологиялар техникумунуң инклюзивтиг салбырының дөрткү курсчузу, Айда-Сай Монгуш - Катанов аттыг Хакасияның күрүне университединиң Медик-психолог-социал институдунда клиниктиг психология студентизи, а Долаана Тоюндуп – ТывКУ-нуң күш-кульура болгаш спорт факультединиң магистрантызы.
Россияның 20 регионундан 86 спортчу маргылдаага киришкен. Хааглыг черге эрткен кышкы маргылдаада ча адыкчылары 18 метр ырактан адарынга мөөрейлешкен.
Шимчээри багай спортчуларның ча адар маргылдаазы – 1960 чылда, Италияның Римге I Паралимпийжи чайгы оюннар үезинде, Паралимпийжи оюннар программазынче кирген хевирниң бирээзи. Токиога (Япония) XVI Паралимпийжи чайгы оюннар үезинде, российжи спортчулар бир алдын база ийи хүлер медальданы чаалап алган.