Енисей Сибириниң аныяктары Кызылга эртер шуулганга боттарының инновацияларын таныштырар

Ноябрьның 17-18 хүннеринде Тываның найысылалынга «Инновациялар-2022» деп IV регионнар аразының аныяктарның чаартыкчы чорук шуулганы болуп эртер. «Енисей Сибири» төлевилел чорудуунуң хемчээн Тываның күрүне университеди, Хакассияның күрүне университеди база Сибирьниң федералдыг университеди организастап эрттирер.
Тыва, Хакасия база Красноярск крайдан студентилерни, аспирантыларны, аныяк эртемденнерни, өөредилге черлериниң өөреникчилерин, 35 хар чедир назылыг ажылдыг аныяктар аразындан аныяк инноваторларны шуулганче чалаан. Шуулганның шөлчүгежинге аныяк шинчилекчилер биле эрге-чагырга, сайгарлыкчылар, экспертер төлээлериниң аразынга диалогту организастаар.
Аныяктар ортузунга эртем-шинчилел болгаш чаартылга ажыл-чорудалгазын нептередири, “Енисей Сибири” төлевилелдиң киржикчилери школалар, ортумак тускай база дээди өөредилге черлериниң эртем адырынга чоок кады ажылдажылганы чедип алыры - кол сорулга. .
6 угланыышкынга: көдээ ажыл-агыйында агротехнологиялар болгаш инновациялар; информастыг технологиялар, энергетика база инженер инновациялары; Енисей Сибири макрорегионнуң чурттакчы чонунуң амыдырал шынарын бедидер ужурлуг культура-өөредилге инновациялары; медицина болгаш кадык камгалалы; регионнарның турпродуктулары; экология база бойдусту ажыктыг ажыглаарының талазы-биле аныяктарның эртем-техниктиг чогаадылга делгелгези - шуулганның төп хемчээ. Оон аңгыда программада - инновация талазы-биле сайгарлыкчы чорук мастер-класстары база чалаттырган аалчылардан бизнес-тренингилер, солун культура-өөредилге кезээ кирген.