Энергия камналгазының талазы-биле бүгү-российжи диктантыны бижииринче Тываның чурттакчыларын чалаан

Тываның 12 хардан өрү назылыг чурттакчы бүрүзү https://energydict.ru/ сайтыга онлайн хевирге эртер III бүгү-российжи «Е-Диктантыга» киржип, бажыңга энергияны камнаарынга хамаарыштыр бодунуң билиглерин хынап болур. Чуртталга-коммунал ажыл-агыйының эде чаартылгазынга деткимче фондунуң чылдың-на эрттирип турары акция октябрь 20-де эгелээн.
Диктантыны үш чадага чорудар. Бирги информация-өөредиглиг чадазы ноябрь 20-ге чедер. Аңаа киржирде Е-Диктантының албан езузунуң сайтызынче база социал четкилерде аккуантызынче киргеш, онлайн-тест дугайында тайылбыр-биле таныжар.
Оон аңгыда, “Чуртталга-коммунал ажыл-агыйында энергия камналгазының эге билиглерин билири мээң амыдыралымда канчаар дузалааныл” деп темага конкурс бирги чадада болур. Ооң киржикчилери энергияны камнап ап турар дуржулгазын солчуп, энергия камгалалгазынга бодунуң акциязын база сүмелеп болур. ВКонтакте четкиге ажык онлайн-бадылаашкын-биле конкурска тиилээн кижи диктантының организаторларындан бодунуң төлевилелин боттандырар деткимчени алыр.
30 айтырыглыг ийиги чада 2022 чылдың ноябрь 21-ден декабрь 9-ка чедир болур. Аңаа киржирде албан езунуң сайтызынга бүрүткеткеш, салдынган айтырыгларга 60 минута дургузунда харыылаар. Ону чүгле чаңгыс катап кылыр. Ап болур 100 сандан 50 болгаш оон хөй сан алган кижилер дараазында үшкү чадаже эртер.
2-ги чаданың киржикчилеринге ЧКА адырында энергия камналгазының темазынга эң эки парлаан чүүл дээш конкурсту эрттирер. Иллюстрация, видеоролик, презентация, эссе-даа кылдыр ону кылып болур. Оргкомитет материалды бергениниң дээштиин, тывынгырын, чугулазын көрүп, социал четкилерге конкурстуң 15 тиилекчизин тодарадып үндүрер.