Тываның Кадык камгалал яамызы республикада амгы демографтыг байдалды илеткээн

2022 чылдың январьдан сентябрьга чедир, эрткен чылдың ол үезинге деңнээрге, регионда 568 чаш эвээш төрүттүнген. Өлүп-хораар чоруктуң ниити көргүзүү 103 пунктуга кызырылган. 

Отчеттуг үе иштинде Тывага 4464 чаш төрүттүнген, 1000 кижиге онааштыр өзүп-көвүдээриниң көргүзүү 17,9. Эрткен чылдың ол үезинге деңнээрге 12,3 хуу куду. Барыын-Хемчик, Тере-Хөл база Мөңгүн-Тайга кожууннарда өзүп-көвүдээри өскен.

Чыл эгезинден 2072 кижи чок болган, эрткен чылдың ол үезинге деңнээрге 5,7 хуу куду, азы 1000 кижиге онааштыр 8,3 кижи. Россияда 8 айда ол талазы-биле көргүзүг 13,4 болган болза, Тывада оон 1,6 катап эки. Ындыг болзажок, республикада ажылдаар назы-харлыг кижилер аразында чок болганнарның саны Россияда ортумак көргүзүгден 15,7 хуу ажа берген. 

Тывада кижилерниң чок болуп турарының кол чылдагааннары - хан-дамыр аарыгларындан (34,9%), даштыкы чылдагааннардан (26,5%), ыжык аарыгларындан (13%), ижин-хырын органнарының аарыгларындан (7%), тыныш органнарының аарыгларындан (5,36%) база туберкулезтан (3,1%). Даштыкы чылдагааннар ужун ажылдаар назы-харлыг кижилер хорап турар. Тере-Хөл, Тожу база Тес-Хем кожууннарда назы-харның ол бөлүүнге хамааржыр кижилерниң чок болуру көвүдээн.

Республикада өлүп-хораарының сан-чурагайын эвээжедери-биле, аарыгларны эрте илередир сорулгалыг чурттакчы чон ортузунга диспансеризацияны болгаш профилактиктиг шинчилгелерни чорудуп турарын Кадык камгалал яамызы дыңнаткан. «Кадык камгалалы» национал төлевилелдиң республикада боттандырган хөй санныг хемчеглериниң ачызында, чурттакчы чонга эмчи дузазының чедирилгези эки апарган.