Тывада кожууннар аразынга пассажирлер аргыжылгазын катап эгелээр чаа автобүдүрүлгени ажыткан
21.09.2022
Республика Баштыңы Владислав Ховалыгның парламентиге айыткалы езугаар, Тываның Чазаа пассажирлер аргыштырар системаны чурумчудары-биле элээн каш хемчеглерни алган. Кызыл хоорай иштинге, ол ышкаш муниципалиттер аразынга база хоорай чоогунуң маршруттарынга хөй-ниити транспортунга сөөртүлгени чорудар чаа бүдүрүлге – «Туваавтотранс» КХН тургустунган.
Суурлар аразынга аргыжылганы организастаар кылдыр регион бюджединиң акша-хөреңгизи-биле 40-40 олуттуг Yutong маркалыг таарымчалыг 8 автобусту саткаш, бүдүрүлгеде хүлээткен. Кызылды база ол чоок-кавыны хандырарынга 46 автобусту, ооң иштинде 28 ПАЗ Вектор Next база шимчээри кызыгаарлыг хамаатылар сөөртүр кылдыр дерээн 18 «ютонгини» садар керээни «СберЛизинг» компания-биле чарган.
«Туваавтотранс» кожууннар аразынга доктаамал рейстерни октябрьның бирги хонуктарында эгелээр. Эгезинде республиканың беш кожуунун таварып эртер эң узун «Кызыл-Ак-Довурак-Кызыл» маршрут орукче үнер. Чыл төнчүзүнге чедир Эрзин база Өвүр уунче автобустарны салыр.
Айыттынган шупту маршруттарга республика бюджединден субсидияны бээр. 2022 чылдың төнчүзүнге чедир ол сорулгага 6 млн рубль көрдүнген. Тываның Чазаа кандыг-даа үндүрүг төлевейн турар чажыт сөөртүкчүлер-биле «Туваавтотранс» чижилгени тургузар кылдыр чарыгдалдарының чамдыызынга компенсацияны бээр. Субсидияны бербишаан аргыштырылга ачы-дузазының шынарынга хыналданы чорудар. ТР-ниң Орук-транспорт яамызы кожууннар аразының аргыштырылгазын километрлеп, азы бир километрде ортумаа-биле 2 рубль тарифти тургузарын саналдаан.
Кызылга автовокзал тудар төлевилелди ажылдап эгелээн. Амдыызында Кызылдан мурнуу чүкче үнер талада долганыр чер чоогунда черни шилип алган. Шакта-ла 100 кижи аргыжылгалыг автовокзалды тудары көрдүнген. Тудугнуң ортумак өртек-үнези – чартык миллиард рубль. Вокзалдан ырак эвеске автобустар турар шөлдүг «Туваавтотранс» бүдүрүлге-техниктиг баазазын планнаан.
Оон аңгыда, Тываның Баштыңы хоорайлар аразының автобустарынга доктаар черлерни кылыр даалданы база берген. Ол дээрге автобустар тургузар чылыг гаражтар, пассажирлер аргыжылгазынга херек инфраструктуралыг доктаар пунктулар-дыр.
Возврат к списку
|