«Чаңгыс демниг Россия» Тывага эрткен соңгулдаларда тиилээн

13.09.2022 Чаңгыс аай бадылаашкын хүнүнүң Тывага баш бурунгаар түңнелдерин үндүрген. «Чаңгыс демниг Россия» соңгулда кампаниязын бүзүрелдиг болгаш күштүг чоруткан. Ынчалдыр Тываның Дээди Хуралының – Кызылдың Восточный биле Сүт-Хөлдүң чаңгыс мандаттыг ийи округунче немелде соңгулдаларны партияның төлээлери бүзүрелдиг тиилелге-биле дооскан. Барыын-Хемчиктиң Төлээлекчилер хуралынче немелде соңгулдаларга база-ла эрге-чагырга партиязындан бодун идип үндүрген төлээ тиилээн. Мөңгүн-Тайганың хуралынче эрткен шупту 17 депутат – “Чаңгыс демниг Россия” партияның төлээлери.
Кызылдың Төлээлекчилер хуралынче соңгулдаларга КПРФ, ЛДПР база «Новые люди» төлээлери партийжи даңзы-биле 5 хуу алыр негелдени эрткеш, хоорайның хоойлужудулга хуралынче бир-бир кижилери эрткен. Коммунистиерниң бир төлээзи чаңгыс мандаттыг округка соңгулданы ойнап алган. Арткан мандаттар “Чаңгыс демниг Россияда”.
Тываның Баштыңы Владислав Ховалыг чаңгыс партийжилеринге тиилелгези-биле байырны чедирген. Ооң чугаазы-биле алырга, ооң чаңгыс чер-чурттугларында “Чаңгыс демниг Россия” ам-даа алдар-аттыг болгаш бүзүрелдиг. «Бистиң ажылывысты карак-биле көрүп, хол-биле тудуп болур болгаш, ёзулуг-ла хүндүткелге төлептиг. Ол дээрге чаа бажыңнар, чаа бүдүрүлгелер, оруктар, школалар, уруглар садтары, эмнелге төптери, чаа ажылчын олуттар-дыр. Чеже-даа нарын болза, бо берге үеде – пандемияга, экономиктиг ыйыдыышкыннарга, ок-боо-биле чурттувусту сы базар дээн оралдажыышкыннарга удур кижилерни каттыштырып шыдаан бис . Шак ол чаңгыс демивис төрээн республикавыстың болгаш бүгү Россияның чаагай чоруунче – бодувустуң сорулгавысче сыныш чок чоруп, амыр-тайбыңны камгалап арттырарынга дузалап турар» - деп, ол чугаалаан.
Владислав Ховалыг эрге-чагыргага удур партияларның төлээлеринге, боттарын идип үндүргеннерге чылыг-чымчак сөстерни илереткен. Оларның күштүг болгаш төлептиг удурланыкчыларын тиилээни дээрге, соңгулдалар шынчы эрткенинге, ооң түңнелдери чигзиниг чок, чөптүг болганынга бадыткал-дыр деп, республиканың баштыңы санаан.
Тываның Баштыңы хамааты идепкейин көргүскени дээш соңгукчуларга четтиргенин илереткен. Республика чуртта эң бедик көргүзүгнү – 75 хууну көргүскен. «Бо идепкейден эрге-чагыргага, биске дузалажыр улуг күзел, бодунуң ажылын оон-даа эки кылып болур дээнин көрүп болур. Чаа соңгуткан депутаттарга база хуралга ажылчын байдалче дүрген кирип, чон-биле ужурашкаш чыып алганы чагыгларны программа документилери кылдыр кылып, билектерни сывырыпкаш ажылдап эгелээрин күзедим» - деп, Владислав Ховалыг чаа соңгуткан депутаттарга чагаан.