Тывада хыпкан арга-арыг өрттериниң шөлү улгатканындан онза байдал чурумун киирген

08.09.2022 Тываның Баштыңы республикада арга-арыг өрттериниң уржуундан “онза байдал” чурумун киирерин чарлаан. Владислав Ховалыг бодунуң шиитпириниң дугайында блогунга дыңнадып, специалистер күжениишкиннерни үндүрүп турзажок, келир неделяга чедир изип кээри, ам-даа чаа өрттерни өөскүдери магатчок деп бижээн. Регионнуң диспетчер албаны бөгүнде арга-арыг фондузунуң черлеринде 249,6 гектар ниити шөлдүг 10 арга-арыг өрттерин бүрүткээн.
Губернатор онза байдалдар талазы-биле республика комиссиязының хуралында өрттерниң байдалын сайгарып, ону өжүрер кол айтырыгларны чугаалашкан. Бүгү күштерни база аргаларны мөөңнээр, авиа-арга-арыг камгалалындан Рязань облазынче өрт өжүржүп аъттанган 50 десант-парашютчуларны дедир кыйгыртыр шиитпир хүлээп алдынган. Чурттакчы чонну, малчын турлагларны база белеткээн сиген-ширбиилди өрт айыылындан камгалаары - кол сорулга.
Владислав Ховалыг арга-арыг кирерин шеглээрин чонга сагындырып, профилактиктиг хемчеглерни күштелдирерин муниципалдыг эрге-чагыргадан негээн. Бо үеде дыка хөй кижилер тайга тооруу, кат-чимис чыып турар. Ынчангаш кожуун чагыргалары арга-арыгже үнүүшкүннерни чорудуп, чеже кижи ында барын билип, байдалды хыналдага алыр ужурлуг.
Тыва Республиканың Чазак даргазының оралакчызы Тимур Кууларга арга-арыг өрттери-биле демисежир оперативтиг ажылды дүүштүрерин дааскан.
Найысылал чурттакчыларның ынак дыштаныр чери – Бии-Хемниң “Тайга” станциязында бөгүнде арга-арыг өрттенип турар. Кожуун чагыргазы база Арга-арыг болгаш бойдус ажыглалының яамы специалистери дөрт черде хыпкан өрттү өжүржүп турар. Кижилер-биле озал-ондак болбазын дээш, байдал экижииринге чедир станцияже эрттерин кызыгаарлаан.
Регионнуң диспетчер албаны Кызыл, Бии-Хем, Тес-Хем, Эрзин, Улуг-Хем база Чөөн-Хемчик кожууннар девискээринде арга-арыг өрттерин өжүрер ажылдар чоруп турарын дыңнаткан. Бөгүнде хып турар он өрттүң санында, онза хайгааралдыг бойдус девискээрлери болур Тожу кожуунда “Азас” күрүнениң бойдус заповеднигинде база “Убсу-Нур ыйгылаажы” күрүнениң бойдус биосферлиг заповеднигинде өрттер хамааржыр.
2022 чылда өрт айыылының сезону эгелээнден бээр республиканың арга-арыг фондузунуң черлеринге 9692,19 гектар ниити шөлдүг 146 өрт бүрүткетинген. Тыва Республиканың Чазааның доктаалы-биле. өрт айыылының сезону апрель 5-те эгелээн.