Ковид аарыындан камгалал тарыышкыннарны салырын калбартыр

01.08.2022 Бөгүн республика чазааның аппарат хуралында, июльдуң 25-тен 31-ге чедир эрткен неделяда, лаборатория 63 аарыг кижиниң ковидтен аараанын бадыткаанын, кадык камгалал сайыды А. Югай дыңнаткан.
9 муниципалдыг тургузугда – Кызыл хоорайда (+34), Кызыл кожуунда (+11), Ак-Довурак хоорайда (+6), Чөөн-Хемчикте (+4), Таңдыда (+3), Барыын-Хемчикте (+1), Каа-Хем кожуунда (+1), Эрзинде (+1), Бай-Тайга (+1)аарыг кижилер немешкен, эрткен неделяга деңнээрге, 55 кижи хөй (июль 18-24-те – 8 кижи турган).
Амбулаторияда 51 кижи, стационарлыг эмнээшкинде – 28 кижи, эмнээшкинде ниитизи-биле 79 кижи бар, деп кадык камгалал сайыды чугаалаан.
Эмнелгеде чыдар ковидтен аар аараан 28 кижиниң 2-зиниң байдалы берге, 26 кижиниң байдалы - элээн аар.
Ковид аарыы эгелээнден бээр, бо чылдың июль 31-ге чедир, 44567 кижиниң аарыын лаборатория бадыткаан, оларның аразында 9270 бичии уруглар бар. А бо чылдың январь 1-ден 12988 кижи ковидтээни бадыткаттынган. Эң хөй аараан кижилер Кызыл хоорайда – 5 078 кижи, Кызыл кожуунда – 1 562 база Улуг-Хем кожуунда – 630 кижи.
Чүгле чаңгыс эрткен хүнде 17 таварылга бүрүткеттинген.
Аарыгдан камгаланыр эң дээштиг арга - чүгле тарыдып алырында. Тыва Республикада COVID-19-тан тарыткаш, 6 ай эрткен соонда тарыдар ужурлуг 100744 кижи бар. Регионнуң көргүзүглер самбыразындан алгаш көөрге, Спутник Лайттан тарыткан 84 232 кижи, азы тарыткан кижилерниң 83,6 хуузу катап тарыышкынны алырлар. А катап тарыышкынның долу курузун (I база II кезээн) 23 294 кижи алган, катап тарыдар кижилерниң 23,1 хуузу.
РФ-тиң Чазааның Дүүштүрүлге төвүнүң дашборунда сан-чурагайлардан алырга, республикада коллективтиг иммунитеттиң деңнели 14,4 хуу болуп турар. Ынчангаш Тываның Баштыңы онза халдавырлыг аарыгдан чонну камгалап, аарыгга удур тарыышкынны калбартып, коллективтиг иммунитетти 80 хуу чедирери-биле, тарыдар ужурлуг кижилерни тарыышкынче хаара тудар даалгаларны Кадык камгалал яамызынга, муниципалдыг тургузугларның удуртукчуларынга база ажыл берикчилеринге берген. 60 хардан өрү назылыгларны хаара тудар ажылдарны эмнелге участоктарынга идепкейжидер. База ол ышкаш эмнелге албан черлеринге чогуур эм-таңның, чыдар-орун дөжектиң курлавырын тургузарын айыткан.