Тывада эм шынарлыг Дус-Хөлдүң девискээринче чырыкты шөйүп турар

25.07.2022 Республиканың социал-экономиктиг хөгжүлдезиниң бот-тускайлаң программазының акша-хөреңгизи-биле Тывада турисчи инфраструктураны сайзырадыр үш төлевилелдиң бирээзинге Дус-Хөл хөлдүң дыштанылга шөлүн чырык-биле хандырары хамааржыр. Кажан хөлдң девискээринге чырык хандырылгазы турум апаарга, дыштанылга объектилериниң суг хандырылгазын, одалгазын, үзүктелиишкин чок мобильдиг харылзааны база интернетти киирер арга тургустунар. Эм шынарлыг хөлдүң эрик чоогун чаагайжыдарын база чырык дамчыдар шугумну тударын Тываның Баштыңы Владислав Ховалыг бодунуң хууда контролюнда алган.
Дус-Хөлче чырык удазыны шөйер ажылдар адакталганын губернатор дыңнаткан. Чырыкты Таңды кожууннуң Межегей суурдан он хире километрге шөйер. Ында бар болгаш ам тудар дыштанылга объектилерин чырык-биле хандырарынга 630 кВт күчүлүг трансформатор подстанциязын салган.
Хөлче чырыкты кошкан соонда, хөгжүлде бурунгаарлап, ону курортче шилчидеринге идиглиг апаар деп, Владислав Ховалыг бижээн. Регион удуртукчузунуң даалгазы-биле эрик чоогунуң шөлдерин чаагайжыдар ажылдар майда-ла эгелээн. Хөлдү дургаар эрикте брусчатканы чаткан, автомобильдер тургузар черни туткан, бок тогер улуг саваларын салган. Ам эштир черни чаагайжыдар ажылдар кылдынып турар.
Бөгүнде республикада 800 ажыг турисчи объектилер бар, Россияда бирги өглер комплекизи, Сибирьде бирги беш сылдыстыг «Азимут» аалчылар бажыңы ооң санында. Шак ындыг черлер ам-даа немежир. Бо чылын «Чедер» курорттуң аквакомплекизин ажылдадыр, дагдан хаактаар «Тайга» баазазының өрү көдүртүр дериг-херекселин салыр, Сибирьде “Өлүг далай” кылдыр сурагжаан Дус-Хөл хөлдүң девискээрин чаагайжыдып, чырыкты киирер ажылдарны доозары планнаттынган.