Тывада республика Баштыңының шаңналы дээш конкурска тиилээн аныяк эртемденнер тодараттынган

16.06.2022 Тываның Баштыңы Владислав Ховалыг 2022 чылда күрүне деткимчезиниң конкурузунга тиилээн аныяк эртемденнерниң даңзызын бадылаар дугайында айтыышкынга атты салган. Республика Баштыңының грантыларын 12 аныяк шинчилекчилер, оларның ону – Тываның күрүне университединиң ажылдакчылары, а ийизи – эмнелге албан черлериниң ажылдакчылары алыр.

Конкурска тиилээн төлевилелдер аразында - «Школа назыны четпээн уругларга тыва дылда интерактивтиг онлайн оюннарны чогаадып кылыры», «Чуртталга-коммунал ажыл-агыйынга информастыг модельди ажыглаары», «Тыва чонда туберкулезтуң полиморфтуг хевирлериниң нептерээнинге фармакогенетиктиг шинчилел болгаш аңаа удур эм-таң терапиязының айыыл чок чорук параметриниң ниити чүүлү», «Өөредилге ачы-дуза рыногунда шинчилел», «Тываның эмчи ажылдакчыларының амыдырал-чуртталгазының шынары база профессионал өжүүшкүнү», «Мөңгүн волонтерлар» болгаш өске-даа ажылдар бар.

Эртем болгаш техника хөгжүлдезинде көскү үлүг-хууну кииргенин бадыткаан чаа эртем ажылдары-биле ылгалган эртем шинчилелдерлиг болгаш чогаадыкчы улуг салым-чаяанныг 35 хар четпээн аныяк эртемденнерге күрүне деткимчезин тыпсырын сагындыраал.
Тываның Баштыңының грантызын ийи чыл болгаш-ла тыпсып турар. Ооң хемчээли эртем шинчилелин чоруткан чарыгдалдарындан база эртемденниң кол ажылында шалың төлевиринден хөй түң-биле үндүрер. 2022 чылдың республика бюджединде аныяк эртемденнерни деткиир кылдыр ниитизи-биле 420 муң рубльди тускайлаан.




5