Тывада «Абилимпикс» регион чемпионадының тиилекчилери илереттинген

23.05.2022 Кызыл хоорайда «Россия – аргаларның чурту» президент платформазының «Абилимпикс» регион чемпионадының Тыва Республикада киржикчилериниң түңнелдерин үндүрген.

Чемпионат майның 16-19 хүннеринде, тускайлаттынган ортумак өөредилге организацияларының, дыңнаары багай уруглар школа-интернадының, “Бүгү-российжи күш-ажылдың кызыл тук ордени” инвалидтер бүгү-российжи хөй-ниити организациязының Тыва Республика организациязының баазазынга, база Тываның күрүне университединиң баазазынга болуп эрткен.

Республиканың 14 өөредилге черлеринден 99 кижи маргылдаага киришкен. Чемпионаттың түңнелинде бедик профессионал деңнелин база тиилелгеже чүткүлүн көргүзүп, 48 кижи 15 угланыышкында тиилелгени чедип алган.

«Россия – аргаларның чурту» автономнуг коммерцияга хамаарышпас организацияның чиңгине директорунуң бирги оралакчызы Алексей Агафонов «Абилимпикс» профессионал мергежил чемпионады ажылчын мергежилдиң ат-алдарын көдүрүп, кадык-шинээ кызыгаарлыг кижилерге мергежилдер делегейинден шилилдени кылырынга дузалыг деп санаан: «Чемпионат салым-чаяанны ажыдып, бодунуң арга-шинээн өске таладан көөрүнге дузалаар. «Абилимпикс» мөөрей мергежилиниң аайы-биле арга-мергежилдиин көргүспүшаан, регион экономиказын хөгжүдеринге херек мергежил аайы-биле ажылга тургустунарынга, күш-ажылчы хүрээлелди хевирлеп база каттыштырарынга эки арга-хевир болур. Оон аңгыда чемпионат ажыл берикчилеринге база таарымчалыг, олар киржикчилерде улуг курлавырны демдеглеп алырлар».

2016 чылда эрткен бирги «Абилимпикс» регион чемпионадынга деңнээрге, киржикчилер саны 4 катап көвүдээн: 21 турганындан 96 четкен.
Кадыкшыл байдалы кызыгаарлыг, 14 хардан өрү назылыг, улуг класс өөреникчилер аразынга дараазында программаларга мөөрейлешкен: «Ыяшка оюп сиилбиири», «Даараныкчы», «Идик септээри», «Чинчи-шурудан кылыг», «Чазаныры», «Уран дааранылга», «Уран чурулга», «Повар херээ», «Быжып даараары», «Күш-культурага чаңчыктырары», «Веб-дизайн», «Крючок-биле аргыыры», «Эмчи болгаш социал ажаалда», «Очулдурукчу», «Тыва хуужуур».

Инвалид эрге-байдалдыг, колледж студентилери база ажылдыг специалистер дараазында - «Ыяшка оюп сиилбиири», «Повар херээ», "Быжып даараары», «Күш-культурага чаңчыктырары», «Веб-дизайн», «Крючок-биле аргыыры», «Эмчи болгаш социал ажаалда», «Очулдурукчу», «Тыва хуужуур» мергежилдерге киришкен.
Ажыл берикчилери база өөредилге черлериниң башкыларындан тургустунган чемпионаттың эксперт бөлүү тиилекчилерни илередип, медальдарны, дипломнарны, сертификаттарны база суй-белектерни тывыскан.

Чемпионатты Тыва Республиканың Күш-ажыл болгаш социал политика яамызы, «Абилимпикс» национал төптүң деткимчези-биле «Абилимпикс» шимчээшкинни хөгжүдер регион төвү база «Россия – аргаларның чурту» АКчО организастаан.
«Абилимпикс» национал чемпионаттың финалы Москвага болуп эртер.