Тываның Баштыңы Росхереглел хайгааралының регион эргелелиниң хуралынга киришкен

11.03.2022 Хереглекчилерниң эргелерин болгаш кижиниң чаагай чоруун камгалаар адырда хайгаарал талазы-биле федералдыг албанның регион эргелелиниң 2021 чылда Тывага кылып чоруткан ажыл-чорудулгазының түңнелдерин үндүрген хуралга республика Баштыңы Владислав Ховалыг киришкен.
Тываның Баштыңы хамаатыларның сонуургалдарын камгалаар база туржур хайгаарал албанының ажылы каш катап улгатканын демдеглээн. Ылаңгыя коронавирус пандемиязының үезинде инспекторларның ажылы көзүлдүр көвүдээн. Ук албан халдавырны нептередип таратпас хемчеглерни организастап, дүүштүрер ажылдарга эрге-чагырга органнарының кол дузалакчызы болбушаан, эмнелге черлеринден дашкаар пандемия-биле демиселде мурнакчы отряды апарган.
Санитар-эпидемиологтуг байдал нарыыдай бээрге, Росхереглел хайгааралының специалистериниң сүмээлээни езугаар кызыгаарлаан хемчеглерни киирген турган. Албан ооң-биле чергелештир, бизнесте, садыг-наймаада, чээлилээшкинде, ачы-дуза адырында хамаатыларның эргелерин сагып турарынга контрольду чоруткан. Республика чурттакчыларының сонуургалдарын камгалаан бүгү талалыг улуг хемчээлдиг ажылдың ачызында, пандемияның нарын байдалын турум тудуп, болуушкунну чедимче чок талаже болдурбайн, чуртче санкциялыг базыышкыннарны ажып эртип шыдаан.
Владислав Ховалыг эргелелдиң ажылдакчыларынга пандемия үезинде карак кызыл база чымыштыг ажылы, профессионал чоруу дээш четтиргенин илереткен. Чедиишкиннерни кошкатпайн, харын-даа чаа-чаа, бедик сорулгалар дээш ажылдаарын ол күзээн. Ол кым-бир кижиниң күзели эвес, а үениң негелдези ындыг. Амыдырал-чуртталганың стандарттары-биле кады, технологтуг хөгжүлде өскенинден, ол ышкаш иштики база даштыкы чөңгээниң үнүп эгелээнинден хереглекчилерниң эргелерин камгалаары чугула апарган. Хөгжүлдени хереглекчилерниң негелдези хандырып турар болганда, барыын чурттарның киирген санкцияларындан экономиканы дарый эде тургузарын байдал негеп келген.
«Тываның чурттакчы чонунуң чаагай чоруу дээш кады ажылдаарынга эң-не делгем шөл силер-биле бисте бар. Чедиишкинниг кады ажылдаарывыска бүзүрээр мен» - деп, республика баштыңы Росхереглел хайгааралының регионда эргелелиниң коллективинге чугаалаан. 2021 чылда онза шылгараан ажылдакчыларга күрүне шаңналдарын Владислав Ховалыг тывыскан.
Росхереглел хайгаарал эргелелиниң удуртукчузунуң орлакчызы Ольга Монгушка, Өвүр кожуунда девискээр килдизиниң улуг специализи Алимаа Сатка, Барыын-Хемчиктиң Гигиена база эпидемиология төвүнүң эпидемиолог эмчизиниң дузалакчылары Татьяна Шомбул биле Раиса Монгушка, Улуг-Хемниң Гигиена база эпидемиология төвүнүң бактериолог эмчизи Оржун Межеккейке Тываның Чазааның Хүндүлел бижиктерин тывыскан.
Росхереглел хайгааралының регион эргелелиниң санитарлыг хайгаарал болгаш социал-гигиена шинчилел килдизиниң кол эксперт специализи Алимаа Онанны, Тываның чумага удур станциязының эпидемиология килдизиниң эргелекчизи Нениле Ондарны, Улуг-Хемниң Гигиена база эпидемиология төвүнүң эпидемиолог эмчизиниң дузалакчызы Вера Баркованы, республиканың Гигиена база эпидемиология төвүнүң ажылдакчылары, эпидемиолог эмчи Менги Ховалыгны база санитарлыг хайгаарал килдизиниң эргелекчизи Елена Ховалыгны Тываның Баштыңының Өөрүп четтириишкин бижиктери-биле шаңнаан.