Тывада мартты туберкулёз-биле демиселдиң айы кылдыр чарлаан

11.03.2022 Тывада туберкулез талазы-биле эпидемиологтуг байдал чогумчалыг эвес. 2021 чылда девискээрде аарыыр чорук ортумак российжи көргүүзүгден 3,7 катап, Сибирь федералдыг округда – 2 катап хөй. 2020 чылга деңнээрге аарыыр чоруктуң өзүлдези 42,4 хуу болган.

Тываның Кадык камгалал яамызы бо чылда бодунуң ажыл-чорудулгазының мурнады боттандырар угланыышкыны болур туберкулез-биле демиселдиң немелде хемчеглерин тодараткан.
Тываның Баштыңы Владислав Ховалыгның даалгазы езугаар, ведомство туберкулез-биле демиселдиң узун хуусаалыг регион программазын ажылдап кылгаш, ында туберкулезка удур чаа эмнелге тудуун киирген.
Республиканың чурттакчы чонунуң туберкулезтан аарыыр чоруунуң хөйү - чидиг айтырыг болуп артпышаан. Эрткен чылын 405 аарыг кижини учетта алган, ооң мурнунда чылдың бо үезинге деңнээрге, 42,2 хуу хөй.

2021 чылда республиканың 14 муниципалдыг тургузуунда туберкулезтан аарыыр чорук өскен. Тес-Хем (6,4 катап), Мөңгүн-Тайга (3,9 катап), Таңды ( 2,4 катап), Чөөн-Хемчик (1,8 катап) кожууннарда ол көргүзүг республикада ортумак сан-чурагайларны ашкан.
Профилактиктиг шинчилге үезинде 263 аарыг кижи илереттинген, 2020 чылга деңнээрге 1,9 катап хөй.
Туберкулезтуң ажык хевиринден 110 аарыг кижи өлген, 100 муң чурттакчыга онааштыр 33,3 кижи, 2020 чылдың деңнелинден 10,7 хуу эвээш.
Өвүр, Каа-Хем, Бии-Хем, Чеди-Хөл, Тожу, Чаа-Хөл база Тес-Хем кожууннарда база Кызыл хоорайда туберкулезтан аарыыр чорук көвүдээн.
Үезинде ФГ-шинчилгени эртип алыры, туберкулезту эге чадазында тодарадып, когун үзе эмнээринге дээштиг. Кадык камгалал яамызы, чурттап турар чериниң аайы-биле поликлиникага шинчидип ап болурун, дыңнаткан. Регионнуң шупту төп кожуун эмнелгелеринде дерээн көжүп чоруур ФГ-системалар суурларны эргип турар.

Регионнуң Кадык камгалал яамызы, марттың 24-те демдеглээр туберкулез-биле демиселдиң бүгү-делегей хүнүнге тураскаадып, Кызыл хоорайның чурттакчыларынга база аалчыларынга көжүп чоруур ФГ-дериглер-биле үнүүшкүннерни организастаар.
Марттың 24 база 28 хүннеринде, Кызылдың Арбат шөлүнге база солагай талакы дачалар девискээринге, флюография машиналары ажылдаар.
Март 10-да, ТР-ниң Кадык камгалал яамызының штаттан дашкаар кол фтизиатры Лаура Мар-ооловна Ананды ведомствонуң ⠀
- https://www.instagram.com/minzdravtuva/ аккуантызынга дорт дамчыдылгаже үнүп, туберкулез талазы-биле тайылбырны берген. Ведомствонуң арынындан дорт дамчыдылганың бижидилгезин көрүп болур.